Aizawl: New Delhi-a cham mek Chief Minister Adviser (Finance) TBC Lalvenchhunga, MLA chuan Zirtawpni khan Finance Minister Nirmala Sitaraman chu a pisaah kawmin, Mizoram sum dinhmun leh Centrally Sponsored Scheme chungchang a sawipui.
TBC Lalvenchhunga hian Central Sector Scheme leh fund hrang hrang hmanga Mizorama hna thawh a nih thin dan te chu Finance Minister a hrilhfiah a. Sorkar tharin ram hmasawnna atana ruahmanna thar a neih hrang hrangte thlenin, Central sorkar chhawmdawlna an dawnte chu tha taka lo kalpui an tum thu te pawh sawi.
Chief Minister Adviser hian hemi ni vek hian NITI Aayog-a senior permanent member, economist Dr Arvind Virmani hmuin, sorkar thil pawimawh a sawi pui a. Dr Arvind Virmani bakah hian TBC Lalvenchhunga chuan Mizoram leh Meghalaya bialtu Hemant K Meena, Deputy Secretary chu Mizoram sorkar hmalak dan leh kalphung hrang hrangte sawipuiin, NITI AYOG Member for North East Dr Paul, Additional Secretary Radha leh mi dangte pawh vawiin hian kawm a tum bawk a ni.