- Dr. Melory
Nausente hi an tawng theih hma chuan an awm nawm loh leh na an neihte hi an sawi theih loh avangin an damlo a ni tih hriat pawh a har thin a. An tah vak vak a, an tlei duh hauh loh chuan na an nei a ni ang tih ringin, nu ten tih tlei luih tumin hnute an barh leh ngawt thin a. An tuihalin an riltam emaw nia rin theih hun a nih chuan hnute pek phawt chu a sual lo va. Mahse hnute pek tam leh boruak an lem tel teuh hian an pum a nuam lo thei a, an tlei duh lo thin a ni ve thei.
A pang a sa emaw natna dang nei nia kan hriat si loh chuan, hnute pek zawh in nu in a kokiah nausen chu bawhtir sela, a hnungah zawi te tein beng thek thek sela. a rawn irh chhuak a, a pum nuam lo chu a reh ve thei.
Tin, nausen hi an tlei duh loh viau chuan an khua a sikin an lu a na pawh a ni thei a, nu ten hriatthiam a tul hle bawk. Hetiang hriat theihna ber chu an chal emaw an bek emaw kut hnung lamin dek ila, a lo sa a nih chuan an khua a sikin an lu a na a ni ang tih rin mai theih a ni. Chuti anga an awm chuan, tuivawtah puan nem fai chiah a, chu chuan an chal leh bek vel chu deh mai tur a ni. Tin, an lo sa em em a nih phei chuan, an lu chu tuiin leih a tha.
Hetianga tih loh chuan an kaih mai pawh a hlauhawm a ni. Tin, an sat vanglai tak chuan puan luma khuh lum bur tur an ni lo; kan khuh lum bur chuan an pangsa chu a lo zual zawk ang.
Nausen zingah hian kawthalo hi natna lar tak a ni leh bawk a. A chhan tam takte hi chu kan ei leh in pek tam lutuk emaw hriak lampang ei tam tir lutuk vang emaw, anmahni rem loh zawng (allergen) thil an ei vang emaw a ni thei bawk. A dang leh chu natna hrik (Bacteria leh Viruses) vang pawh a ni thei. Nausen kawthalo hi ngaihven vat zel tur a ni. Vawi hnih vawi thum chauh pawh khawh sela, oral dehydration powder hi in lamah kawl reng a, doctor rawn lo pawha pek mai a tha. A lo awm remchang lo a nih pawhin chi hmet khat leh chini thirfiante khat, tui chhuanso dah vawh no (glass) khatah chawh a pek deuh sek tur a ni. A luak bawk a nih phei chuan a hlauhawm tawh a; an zun meuh loh phei chuan damdawi inah doctor te pan vat tur a ni. An kua chu vawi hnih vawi thum chauh pawh khawh sela, oral dehydration powder pek mai a tha.
Tin, khawsik pawh ni teh chiam lo hritlang hnaptuia an lo awm hian thlahthlam mai lovin enkawl an ngai a ni tih hriat bawk tur a ni. Hetiang hi ngaihsak that loh chuan bengkherh leh a tawpa bengngawnna hial a thlen thei a ni. Chuvangin nausente hi an lo hritlan chuan tel (mustard oil) lum leh vicks tea an awm leh hnungte chulh tur.
Tin, khawsik pawh ni teh chiam lo hritlang hnaptuia an lo awm hian thlahthlam mai lovin enkawl an ngai a ni tih hriat bawk tur a ni. Hetiang hi ngaihsak that loh chuan bengkherh leh a tawpa bengngawnna hial a thlen thei a ni. Chuvangin nausente hi an lo hritlan chuan tel (mustard oil) lum leh vicks tea an awm leh hnungte chulh tur.
Nausen damdawi pek chungchangah hian nute hian mahni thua chawha pek mai kan ching hle a, hei hi thil tha a ni lo va, damdawi reng reng hi doctor ten kum upat lam leh rih lamte ena an chawh thin a ni a, mahni thua kan lo chawh ve mai hian pek loh tur chi leh pek dan tawk hre lova kan tih thin avangin dam phahna aia chhiat phahna thlentu a lo ni zawk thin a ni. Damdawi hi tlem kan han pe a, an lo that deuh hian doctor-in pek tur a tih zat pe lova tawp san mai kan ching hi a tha lo hle bawk. A chhan chu natna hrik te kha an lo la thi zo lo va, a hnuah a rawn tan tha leh a, chumi hunah chuan damdawi sang zawk a pek a lo ngai ta thin.
Heng te hi damdawi tak tak hmang lova enkawlna a ni ber a, damdawi hman ngai khawpa an na a nih chuan mahni rin dana chawh tawp mai tur ni lovin doctor pan vat tur a ni; tin, doctor ten damdawi pek dan tur an tih ang thlapa pek ngei tur a ni.