Aizawl: Chief Minister Lalduhoma chuan nimin khan a pisa-ah Mizoram SSA Teachers’ Association hruaitute a kawm a, an harsatnate a ngaihthlaksak.
Chief Minister hian zirtirtute dinhmun siamrem an tum dan leh zirna kawnga sorkar policy tlangpuite SSA zirtirtute hi a lo hrilh a, an harsatna thlente chu a changtu department hotute a lo sawipui tur thu a sawi.
Engkim inringtawn taka kalpui tha a tih thu sawiin Chief Minister hian, an pawlin kum liam ta-a sorkar laka thubuai an theh luh mek chu hnukdawk tura ngenin, “Sorkar tharin thinlung tharin in dinhmun a ngaihtuah dawn a ni,” a ti.
Mizoram SSA Teachers’ Association te hian Chief Minister hnenah hian lawmthu an sawi a, a ngennate chu an pawlin rang taka an lo ngaihtuah tur thu an sawi.
SSA hnuaia zirtirtu, Mizoram SSA Teachers’ Assoction (MSSTA) hian SSA zirtirtute Mizoram sorkarah dah ngheh an nih theih nan kum 2018 khan High Court-ah an zualko tawh.
MSSTA chuan September 18, 2019 khan Gauhati High Court Aizawl Bench-ah petition an theh lut nawn leh a, hun eng emaw chen ngaihtuah a nih hnuah Gauhati High Court Judge Justice Nelson Sailo chuan March 17, 2023 khan thutlukna siamin, SSA hnuaia zirtirtu, MSSTA member-te chu Mizoram sorkara School Education Department-a middle school leh primary school-a zirtirtu post ruakah dah nghet turin Mizoram sorkar a hriattir ta a ni.