China-a Yunnan province-a lei mina thi chu mi 20 an tling tawh a, mi 24-te chin an la hre thei lo.
Zhaotong-a lei hi Thawhtanni zing dar 5:51 (India-a zing dar 2:21) vela min niin mi tam tak an tang.
Chhanchhuah hna thawktute chuan khaw vawt tak hnuaiah hna an thawk nghal a, chin hriat lohte an la zawng mek niin state news agency Xinhua chuan a tar lang.
Chhui tawh chinah chuan tlang chhip awih tak tawlhin lei min hi a thlen nia sawi a ni.
Lei min a awh thui zawng hi metre 100 vel lai niin metre 60 vela sang a ni a, metre 6 bawk vela chhah a ni bawk tih thuneituten an sawi niin Xinhua hian a tar lang.
Mi 500 chuang an chenna in atanga thiar chhuah an ni a, chhanchhuah hna thawktu mi 1,000 velin an buaipui mek a. President Xi Jinping chuan hna thawhna hmun velah mi dang awm a phal lo va, Chinese vice-premier Zhang Guoqing chuan thawktute hi a vil bawk.
“Zanah pawh hna hi thawh reng a ni,” tiin thawktu zinga pakhat, Li Shenglong chuan Xinhua hnenah a sawi.
Khuaa cheng pakhat chuan an khuaa a tam zawk hi tar leh naupang an ni tih a sawi a. Mi dang pakhat chuan Thawhtanni tuka mi tam zawk an la mut laiin chhiatna hi a thleng tih tual chhung chanchinbu, Jimu News hnenah a sawi bawk.
“A ring hle a, a nghing bawk a, lirnghing na tak ang mai a ni,” a ti.
Social media-a video thehdarhah chuan chhanchhuah hna thawktute hi in leh lei tla, vurin a bawh karah an che tih hmuh theih a ni a. In chim chhe neih nuaih karah hian mi bungrua a let phung bawk.
China chhimthlang, tlangram hi lei a min duhna lai a ni a. January, 2013 pawh khan helai county-ah tho hian lei min vangin mi 18 vel an lo thi tawh.
Hetih lai hian Thawhlehni zing dar 2:00 velah khan Xinjianga-a Wushi country chu lirnghing magnitude 7.0-a nain a sawi bawk a. CCTV chuan thi an awm lo niin a tar lang a; mahse, chenna in thenkhat a chhia a, hmun thenkhatah power supply a awm loh phah bawk.