India ram danpui hman tan ni, Republic day chu ramchhung hmun dang rualin Mizoramah pawh district leh khaw lian zual hrang hrangah hman a ni a, hmanpuitute chuan thuchah tha tak tak an sawi bakah, sorkar hmalakna leh hmachhawp mekte puanzarna hun atan an hmang hlawm.
Hetiang ram ni pawimawha thuchah leh hmalakna hrang hrang ngaihthlak tur awm thin hi a hlu a, a lawmawm bawk. Mipui lam pawh hian sorkar chetvelna hrang hrangte hi lo chhinchhiah nachang hre thar zual ila, an hmachhawp an tihhlawhtlin leh hlawhtlin loh chikna remchangah pawh hmang zel thei ila a duhawm hle.
Sorkar thar kan hrawn a, an hmalakna leh chetvelna pawh a la ngaihnawm chho rih viau. A lawmawmin, mipui lam pawhin beiseina sang tak kan nei mek a, kan beiseinate a taka a chan chhoh zel kawngah sorkar hmalaknate leh thiltihte hi kan lo chik ve zel erawh a tha awm e.
Mizorama a lawmna pui ber Aizawl a hmanpuitu Mizoram Larsap chuan, “Remna leh muanna venhim hna thawktu police leh dan kengkawhtu hrang hrangte hmalakna mai bakah, NGO te, kohhran te, thuthar thehdarhtute leh mipui thahnemngaihna avangin India rama state muanawm ber kan la ni chhunzawm hi a lawmawm hle a ni,” tiin a sawi bawk a. A lawmawm viau. Hetih rual erawh chuan kan hun tawn mek hi thlir ila, he fakna awri mawi tak ni thinte hi kan ni chhunzawm zel thei ang em? Sorkar leh mipui lam pawhin tihtur kan nei ve theuh awm e. Insawisel nasa thin viau mah ila, a tul hunah chuan thawhho dan kan thiam zual deuh deuh zelte pawh a tha ngai tih kan hriat thar zual leh a va tha em.