Italian tennis player talent nei tha Jannik Sinner chuan a vawikhatna atan Grand Slam title a vaw chhuak a, Australian Open final-ah set hnih a hniam zawk a nih hnuah ropui takin Daniil Medvedev a beilet a, ‘comeback’ hnehna a chang.
Kum 22 mi Sinner hian set hmasa pahnih a hloh hnuah hian chiai miah lovin nghet leh tlo takin a khel zui a. A khingpui in na taka a nawr thin chu a tir lamah ven har ti mahse set hnih hnuah a insiamrem a, huntha a neih apiang chhawr turin fing takin a inkhel a. A tawpah 3-6 3-6 6-4 6-4 6-3 in Grand Slam final a khelh hmasak berah a chak.
- Italian chhuanvawr
Italy hmar lam, German tawng hman nasatna lai la ni pha, South Tyrol a piang leh seilian Sinner hian kum 2018 khan professional tennis a khel tan a. Kum 2019 khan mipa tennis inelna sang ber Association of Tennis Professionals Tour-ah a khel.
Kumtin a hma a sawn thin avangin fak a hlawh thin a, court chhunga a chiai ngai miah lohna leh a chetdan a fin thin avangin a ngaihsan Roger Federer nen tehkhin a hlawh thin a. Federer ngei hian a inkhelhdan chu a lo fak tawh.
Season liamta a khar that avangin kumina Grand Slam a player hlauhawm ni thei tura ngaih zingah chhiar tel a ni a. Toronto a ATP 1000 title a lak bakah player lansgar hneh a nei nual a. Davis Cup-ah Italy champion chhan lian tak a nih bawk avangin a lakah beiseina a sang.
Kumin a Grand Slam inelna hmasa berah beiseina chu a tak ram a chantir nghal a, inrintawkna lian tak nei turin tun tumah Melbourne Park-ah a inkhel.
Final luhna kawngah Novak Djokovic chu hneh takin a vaw thla a. Medvedev-a’n tlo zawk nih tum mahse a dang zo lo.
“Set hmasa pahnihah khan inkhel a rang hle a, khangah kha chuan a harsa ka ti hle. Mahse ka tan huntha a awm hun ka chang a, ka neih veleh ka chhawr a ni.” tiin a chak hnuah a sawi a ni.