Aizawl: Chief Minister Lalduhoma’n hmasawnna hna thawh kawngah dawngtu beneficiary tur thlanah duhsak zawng nei lovin, mi hlawhtling ngei turte a zawng zawk niin a sawi.
Thenzawl ram, Lamlian dung zauva Dragon Fruit chingtu pawl, Thenzawl Dragon Fruits Growers & marketing Society in Inrinnia General Assembly vawi 3-na an neih a hmanpuinaah Chief Minister Lalduhoma chuan, ZPM sorkar chuan hmasawnna hna engkimah a dawngtu tur thlanah duhsak zawng a nei dawn lo va, mi hlawhtling ngei turte a zawng zawk nia sawiin, Dragon fruit chingtute chu eng party mi leh sa pawh ni se, an huan tipuitling se tih chu an duh ber a nih thu a sawi.
Lalduhoma chuan Lamlian dung zauvah hian sorkar sum leh huan neitute sum tam tak senral a nih tawh thu a sawi a. Tunah hian hmalakna zau tak kalpui mek a nih thu leh, an mamawh ber chu a panna kawng ]ha a nih thu a sawi a. Sialsuk dai emaw, a remchanna hmun atanga an huan hmun panna tur kawngpui siam nan hian Rs. vbc 31.84 an dah hran tawh thu a sawiin, “He sum hian kawng zal tha zawk zawn chhuah te a tul dawn avang leh, black topping-na nen vek chuan a daih rih lo mai thei a. Amaherawh chu, contractor ten dik taka an hman phawt chuan tluang taka hman theiha laihna tur chu a daih kan ring a ni,” a ti.
Thenzawl Dragon Fruits Growers & Marketing Society ten an thlai thar leisaktu tur Local Soda Pvt Ltd., te nena thawhhona an lo siam chu thil lawmawm tak a tling tih chief minister hian a sawi a. Local Soda te hian kuthnathawktute thlai tharchhuah an leisak a, an sawngbawl a, hma an sawn zel dawn phawt chuan Hand Holding Policy hnuaiah an thawk dun theiin a rin thu sawiin, “Tun hnaiah Mizo thalai fing leh thiam tak tak, entreprenuer tha an rawn pung chho zel a. Heng thalaite hi sorkar chuan an banah kaiin kan hnuk dawr dawr dawn a ni,” a ti bawk.
Inkhawm hi Society Chairman C. Lalrinthanga’n a kaihruai a, Er. H. Ginzalala, Adviser to Chief Minister (technical) pawhin thu a sawi a ni.
Lamlian dung zauvah ah hian kum 2021 atang khan chhungkaw 50 in ram hectare 82.79 a zauvah dragon fruit hmun an siam a. Sorkarin MIDH, FOCUS leh tanpuina awm thei dangte in unit 129 siamna an pe a, drip irrigation system an pe bawk. Unit 1 hi ban 200 zel a ni. Sorkarin a tanpuina leh an mi mal hmalakna te nena belhkhawmin tunah hian unit 150 an nei tawh a, a vaiin kung 30,000 vel neiah an inngai a ni.