Aizawl: Rural Development Minister Prof Lalnilawma chuan tun hnai khan sorkar laipui hotu hrang hrangte chu New Delhi-ah a dawrin, Mizoram sorkar hmachhawpte a sawipui bakah mamawh te a thlen nghal bawk.
RD Minister hian Union Rural Development Minister Giriraj Singh chu a chenna inah hmuin, ni 100 inhlawhna tia hriat MGNREGS December leh January hlawh la lut lote pe chhuak thuai turin a ngen a. Hei bakah, March thla thlenga wage component chhut chhuah sate pawh a hun taka pek chhuah a nih theih nan ruahmanna siam sak turin a ngen nghal bawkin, Union RD Minister hian a rang lama bawhzui nghal a tum thu a lo hrilh.
Union Minister of Jal Sakti Gajendra Singh Shekhawat chu a chenna inah kawm bawkin, RD Minister hian Reiek khaw bula ruahtui khawlna atana Tan Lui khuahna tur leh pilot project atana district tina ruahtui khawlna tur tuikhuah siam theihna hmun remchang zawn chhuah a, zirchianna tur sum mamawhte a dil a. Minister hian theihtawp chhuaha kawng zawn sak a tum thu a sawi.
Prof Lalnilawma hi tun hnai khan official-in Taiwan a zin a. A zin haw lamah Delhi-ah chamin, Republic Day chu Delhi Mizoram House-a thawktute a hmanpui nghal a ni. Republic Day a hmanpui zawh hian Union Minister pahnihte hi a kawm nghal a ni.