Durtlang kawngchho a inhmun laih hi a him lo

Kum 20 dawn lai a liam ta. Aizawl – Rangvamual kawngpui kawng Rangvamual thlen dawn kawngpui chu mihausa pakhatin petrol pump atan a lai a. Laih phalna hi a lo nei thlap. Mahse, fur a lo thleng a. Kawngchhak lam laih mêk chu a chim ta. A huam chin a zau em em a. Rangvamual in thenkhat chu thiat a ngai a. Kawngthlang lama concrete in sak zawh hlim chu luah tlak lohin a chhe vek bawk. Chu chu mimal tlemte tawrhna chauh a ni. Helai kawng mipui tana zawh hleih theih loha a awm chhung kha kum sawm dawn ani nghe nghe anih kha. Kha kawngchhia khan mipui min chawhbuai zia leh kan tawrh nasat dan kha kan la hre reng awm e.

Tunah hian Bawngkawn atanga Durtlang panna kawngchhakah mi pakhat chuan petrol pump tur a lai leh ta mup mup mai. A chung lam kham sanzia mipuiin kan hria. Eng angin nge mipuiin kan tawrh leh dawn le. Han en reng reng pawha a him lo tih hriat ngawih ngawih kawngchhak lam laih phalna hi Aizawl Municipal Corportion hian engtinnge an pek theih le. Mizoram in leimin avanga harsatna kan tawh hi in ven kan tum miah lo em ni le? Kumdang ang bawkin fur a lo thleng leh ngei dawn. Lei laih hi eng angin nge a chunglam a chim belh ang. A chung lama Theological college hi eng anga ngaihtuahawm nge anih dawn le. Helai tlang hmel hmang hi a danglam dawrh thei tihte hi kan ngaihtiah em. Helai kawngpui pawimawhzia hriain sawrkar chuan kum 2005 khan sum tak tak sengin an zauh anih kha. A bik takin Durtlang leh Sihphir lam nitina office kal tan phei chuan a lawmawm em em a. Office kalpaha khaw hawi a nuam a. Kawngpui nuam takah a tlan theih ta bawk a. Aizawl veng dang lakah pawh an insawi theihna pakhat a ni. Tunah hian helaiah hian harsatna an tawk ang em. Durtlang leh Sihphir mipui hian sawi ringawt lova a taka kan duh lohzia kan lantir a va hun em.

Aizawl master plan 2013 ah khan Chanmary – Chaltlang te, Bawngkawn – Dutlang kawngah hian kawng atanga 50ft aia hnaia building sak phal anih loh tur thu cabinet pawmpui a lo awm tawh a. Chumi hnua building sak thar engzatnge awm tawh? Chaltlang kawng chho a mimal in ding luah maite hi aw. Kan hmu vek. Dan kengkawhtute hian anmahni dan zam tal hi chu zawm se a va tha em. Bawngkawn – Durtlang kawngah hian rei tak chhung chu in sak phal lohin Lsc nei pawh an stay kha a ni a. Engtinnge tunah hian petrol pump tur laih phalna an lak leh tak mai.

Henglai kham chunga kawngpui nuam tak kan neihte hi khawthlir tinuamtu, nun tihlimtu anihna te kan hmu thiam thei lo hi a pawi takzet. Mipui hmangaihtu sawrkar kan nei tak tak anih chuan heng thil tha lo lakahte hian han che chhuak se a va lawmawm dawn em.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427