Aizawl: Union Minister for Power & New & Renewable Energy, RK Singh chuan tlangram mila Small Hydel Project siamna scheme thar chu cabinet-in a pawmpui tura chhawpchhuah a nih mek thu P&E Minister F Rodingliana a hrilh.
Tun hnai khan P&E Minister F Rodingliana hian RK Singh chu New Delhi-a a pisa-ah kawmin, Mizoramin kawlphetha lama a intodelh nana mamawh leh hmachhawp hrang hrangte a thlen a. An inkawmnaah hian Union Power Minister RK Singh chuan, Mizoram tan zaa 10 Gross Budgetary Support hnuaia Power project paruk thawhna tur sum, Rs vbc 273.21 chu DONER Ministry lama tihfel ngai la awmte tihfel nghal anih tur leh a rang thei ang ber a lo sum pek chhuah an tum thu a sawi.
Union Minister hian Mizoram ang tlangram mil Small Hydel Project siamna scheme thar chu cabinet pawmpui tura chhawpchhuah anih mek thu leh, pawmpuina a awm veleh proposal theh lut tura a hriattir nghal tur an nih tur chu P&E Minister hi a hrilh a. Rooftop solar subsidy rate chu zaa 40 atanga zaa 60 ah tihsan a nih tur thu leh, phalzat bituk awm lova proposal lut ang ang an lo pawmsak tur thu a lo hrilh bawk.
Tunlai thiamna thar ber hmanga Pumped Storage Hydropower Project chu Mizorama hman anih ve theihnan, he project kalpui mekna West Bengal leh Andhra Pradesh ah te zir chiang turin Mizoram atanga zirchiangtu tur team tirh Minister in a dilna chu Power Minister hian a remtihsak bawk.
Union Minister hian kawlphetha lak leh sem dan kalphung tihchangtlunna tur Central Scheme Revamped Distribution Sector Scheme (RDSS) hnuaia hnathawh tur smart metering leh thil dangte chu tun financial year chhung ngeia pawisa a pek chhuah tur thu Minister a hrilh bakah, Mizoram chhungah eng la dawng ve lo khua emaw, chhungkua emaw an awmloh nana hma lo la turin Minister hi a chah bawk.
P & E Minister hi Alexander Chawngthu, Additional Resident Commissioner, Mizoram House, New Delhi in a tawiawm a ni.