Congress minister hlui, Zodintluanga Ralte chuan Vairengte Forest Check Gate-a hmunphiah an kaltlangtir lo chu kut hnathawktute hmuhsitnaah ngaiin, a rang lama enfiah turin Mizoram sorkar a phut.
Inrinni khan Zodintluanga Ralte leh MPCC Secretary Anggu Lalhmachhuana ten Vairengte Forest Check Gate an tlawhin hmunphiah chingtuten harsatna an tawh dante an zawh fiah a. Vairengtea kut hnathawktute harsatna ngaithlain Zodintluanga Ralte chuan, “Mizoram sorkar kut hnathawktu ngai pawimawh inti sorkar thar, kalphung thar tia mipui hnena inzuarten Vairengte hmunphiah chingtute a ngaihthah hi Mizoram mipui zah lohna leh hmunphiah chingtute hmuhsitna a ni,” a ti.
Hmunphiah keh hunlai tak a nih thu sawiin Zodintluanga Ralte chuan, “A par tawh chuan kg 1-ah Rs 8 bawrin an hralh thei chauh a. A man a tlahniam nasa hman tawh hle thin a. Hetiang a nih avang hian sorkar thuchhuah nghakin an hmuhphiah par tur hi beidawng takin an thlir mek a. Sorkar tharin hmunphiah chingtute tana thutlukna a la siam theih loh avanga an harsatna hi a rang thei ang bera chin felsak turin Mizoram sorkar ka ngen a ni,” a ti.
Zodintluanga Ralte chuan kum dangah chuan tun ang hunah hian a man (rate) sang tak takin an hralh tawh thin thu sawiin, “Sorkarin an tan hmalakna a nei lo hi Vairengte kut hnathawktute harsatna lian tak a ni bawk. Hmunphiah hringa hralh tur nei an nih deuh vek avangin hmunphiah hralhnaah harsatna an tawk nasa hle,” tia sawiin, Vairengte Forest check gate-a a kaltlang thei lo chu lungchhiatthlak a tih thu a sawi.
Congress minister hlui hi Jerome L. Bawlte, GS NSUI leh Serlui Block Congress Committee hotuten an tawiawm bawk.