- Ruata
India ramin a nghahhlelh Mahindra Thar 5 door version chu kumin kum chanve hnulamah hian Mahindra in an tlangzarh beisei a ni a, he lirthei chungchanga kan hriat theih chin chin han thlir ho ila, chiang leh fiah zawkin he lirthei nihphung tur pawh hi kan hre chho zel dawn a ni.
Mahindra Thar-ah hian a siamphungah a hma aia sei leh kawngka pawh tam zawk a ni dawn a. Tuna chhuak mek nena khaikhin chuan a danglam dawrh dawn a tih theih a. Hetihrual hian la chhunglama a kentel leh a chhung siamphung hrang hrang te chu a danglam tam dawn lutuk lo a ni.
Mahindra Thar 5-door lo chhuak tur atan hian eng hming nge an hman dawn tih a la chiang lo a. Mahindra chuan tunhnaiah Thar tih hming tel hming hrang hrang an trademark nual a. Heng zingah hian Thar Armada tih hming pawh a tel ve a. 5-door Thar hming tur a ni em tih erawh a la chiang lo a ni.
- Kentel tur hrang hrang
Mahindra Thar chhuak mekah hian customer khawi atang mahin a chhunga a thil kentel thuah te, technology changkang hrang hrang a kentel thuah te sawiselna liantham a awm lo a. Tunah pawh hian Mahindra Thar tharah hian thil thar diai tam tak an dah kher ang em tih a la sawi theih loh a ni.
Hetihrual hian market lamah tuna Thar chhuak mek chung, SUV changkang leh man to ho zinga chhiar tel tur a nih chhoh tawh avangin a kentel erawh tunhnai thiamna hmanraw thenkhat an rawn dah belh ve ngei hmel a ni.
Mahindra Thar 5-door an enchhin hrang hrangah hian a chhung te pawh a hmuh theih thin a. Hetah hian XUV400-ah te pawh kan hmuh ang 10.25 inch infotainment screen a awm niin a lang a. Heti a nih chuan a mawiin a changkang viau dawn a ni. Hei hi XUV400 a va tawm a nih chuan he infortainment system-ah hian Adrenox software kan hmu a, OTA update thar te pawh a rawn neih hmel a ni. A lirthei enchhin hoa tunhnaia langsar leh darh leh mek chu a 10.25-inch digital driver display hman hi a ni a. Hetiang hi Mahindra XUV700-ah pawh kan hmu a, hei erawh a man to leh variant sang hoin a hman hmel a, a man tlawm hoah chuan analogue dials ho kan hmu hmel thung a ni.
Mahindra Thar 5-door thar turah hian Dash cam pawh a awm beisei a ni a. Hei hi a dashboard-a camera awm tihna a ni a. Lirthei himna hmanraw zinga mi a ni. Mahindra Thar 5-door lo chhuak turah hian a driver seat hnung chiah tlarah hian thutna hrang leh thuthleng sei te duhthlan tur a awm beisei a ni a. A hnunglamah AC vent a awm ve dawn bakah sunroof te pawh kan hmuh hmel a ni.
- A siamphung leh khawl
Tuna chhuak mek aiin Mahindra Thar 5-door version lo chhuak tur hi 300mm in a wheelbase (a hnung leh hma ke innghahna lai inhlat zawng) a sei zawk dawn a. A chhung pawh tuna chhuak nena khaikhin chuan a zau nuam hak dawn a ni. Tuna 3-door version chhuak mekah hi chuan bungraw tlemte chauh a hnunga a dah theih laiin a thar turah hi chuan a dah theih nual beisei a ni a. Mahindra Thar thar tur hi tuna chhuak aiin a chhung an duanna hmanraw hrang hrang hi a quality a san zawk fe beisei a ni bawk a ni.
Tuna chhuak mek 3-door Thar leh chhuak thar tur 5-door version hian khawl thuhmun, 2.0-litre turbo-petrol engine leh 2.2-litre turbo-diesel engine te an nei dawn a. 6-speed manual leh automatic gearbox duhthlan tur a awm a. A chanchin hi chiang leh fiah, dik zawkin kan la hre chho zel ang a, June thlaah hian production (siamchhuah hna) pawh an tan chhoh beisei a ni.