Aizawl: ZPM Working President K Sapdanga’n an sorkar an siam tirh phata ni 100 chhunga tih tur an ruahmannte chu an tihhlawhtlin mek thu a sawi.
ZPM-in nimina an party pisa-ah chhung inkhawm an neihah thu sawiin Home Minister K Sapdanga chuan, chief minister-in sorkarna an siam tirhah ni 100 chhunga thawh tur a puang tih sawiin, “Bul tan nghalin inrenchem kan thupui a, second khat chhungin Rs nuai 400 kan hlep nghal. Ni 100 chhunga tih tur kan ruahmante kan tihlawhtling mek. MLA tharten lirthei a thlawna Rs nuai 10 an dawn theih chu tihtawp a ni a, second khat chhungin Rs nuai 400 kan hlep nghal ringawt mai a, chief minister tiamin minister-ten car pakhat leh support car pakhat chauh kan kawl ta a ni,” a ti.
Chief minister leh minister zin inzui vak vakte tihtlem tumin a hautak lo zawnga hmalak a nih thu sawiin K Sapdanga chuan, “Chutih rualin, loh theih loh chin a awm ve a. Kan hriatthiam a ngai. Zirlai ten minister hmuah khap a ni a, inzawn khap a ni bawk. Minister leh MLA-ten thawktu leh an dawn theih tam tak a zat ve a tihhniam a ni a, office leh bangla bungraw thar lei rih loh a ni,” tiin, sorkar kum thar tur Year of Consolidation-ah puan a nih thu a sawi.
K Sapdanga chuan November leh December sorkar hnathawk hlawhte thla tirah pek an nih thu sawiin, “SEDP sem bang Rs. 150 crore atangin Rs. 120 crore chu thlai thar lei nan dah nghal a ni a, sorkar sum mi mal account-a dah lo inching fel turin ngen an ni. Resource Mobilisation Department-te thiah nghal an ni bawk a. Entitlement theuhah lungawi tura ngen an ni,” tiin, minister-in hma an hruai a, a zui turin official-te kan cho a, sorkar hnathawk aikal lak chungchangah chak taka hmalak nghal a nih thu a sawi bawk.
Sorkar hmasa work order nei, hna tan tawhte chu chhuhsak an tum loh thu sawiin home minister chuan, “Hna quality lamah erawh kan fet hle dawn a, hna la tan lo erawh stay nghal tur a ni. Hmachhawp leh tihfel tur a la awm nual,” tia sawiin, monitoring committee an din a, recognise party tin aiawh, kohhran aiawh leh NGO aiawhte an tel dawn tih a sawi.
Home minister chuan State Marketing Board an din tur thu leh thlai thar lei hna an thawk chho dawn tih a sawi a. Boundary committee din tur a nih thu te, na takin ruih theih thil dona kalpui nghal a nih thu te, car leh man power entitlement service rules leh manual-in a sawite zawm vek turin an inphut thu leh, police department-ah chuan February thla chhunga inchinfel an tum thu sawiin, Zoram mipuite hlemhletna do turin a sawm a ni.