Aizawl : ZO Reunification Organisation (ZORO) chuan Burma leh India ramri hrula zalen taka inkalpawh theihna dan Free Movement Regime (FMR) nuaibo tumna leh ramri hung tumna awm mek an duh lohzia lan tir nan nimin khan Union Home Minister Amit Shah lim an hal.
ZORO chuan nimin khan MZP Conference hall-ah Chin Lushai Conference vawi 123-na an hmang a. He hunah hian India sorkarin Burma leh India ramri hrula zalen taka inkalpawh theihna dan, FMR tihtawp a tum chungchang leh India leh Burma hrul ramri hung tum chu tha lo an tiin an duh loh thu sawiin, “India sorkar hian Zofate hi min thendarh a tum niah kan ngai,” an ti.
Conference an hman zawh hian ZORO chuan FMR nuaibo tumna leh India leh Burma ramri hung tumna awm mek duh lo vin, dodal zel an tum thu an sawi a. an dodal zel dawn tih an sawi a. An duh loh zia lantir nan a meizang hlaptu bera ngaih Union Home Minister Amit Shah lim an hal a ni.
ZORO chuan Conference-ah hian khawvel hmun hrang hranga Zofate’n rorelna pakhat hnuaia awm an duh em tih Zoram mipui ngaihdan (referandum) lak an rel a. Zoram mipui tam zawkin rorelna pakhat hnuaia awm an duh chuan United Nations Organisation (UNO) ah thlen a, rorelna pakhat hnuaia awm theih nan chak taka hmalak an rel a. Zo Inpui chungchangah chak taka bawhzui a, Mizoram sorkar nen tang tlanga hmalak an rel bawk.