Aizawl: MNF party chuan nimin khan Mizo Hnam Run-ah chhung inkhawm an nei a. He huna thusawitu MNF Adviser Lalchhandama Ralte, MLA chuan ZPM sorkar chu an nihna dik tak hriat thuai a ni dawn tih a sawi.
Opposition Leader Lalchhandama Ralte chuan sorkar hmalakna a nih vang ringawtin sorkar thar hian thil tha hnawl ngawt lo tura a duh thu sawiin, “Thil tha an tihah kan lawm a, kan thlawp zel ang. Tha zawk tura mipuiin an ngaihten kan phur an rawn phur ve dawn ta a. Eng nge anih kan hre thuai dawn. An nihna diktak kan hre thuai dawn,” a ti.
SEDP hnathawktute sorkarin a chhawr zui zel chu lawmawm a tih thu sawiin education minister hlui chuan, “Chutih rualin, an kal zel dan tur leh engtin nge hma an lak zui dawn tih hi ka zawt a ni. Chhungkaw sang tel te hlauthawng leh mangangin an awm mek a, an hmalam hun ngaihtuahin an indawmkun mek a ni. Hengho chungah hian kan sorkar hian ngilneihna lantir hram rawh se,” tia sawiin, sorkar thar pian hnua health clinic tawp ta mai leh education department bika hmalakna pawimawhte hi chhunzawm ni hram se a duh thu a sawi.
MNF sorkarah kum hnih Covid vangin kut phuar an nih thu sawiin Lalchhandama Ralte chuan, “Hnathawh tak takna hun kan nei tlem tih mi pangngai chin chuan an hria. Kan sum puk sawisel nasa em emtute khan ni 50 pawh a liam hmain cheng vbc. 80 an puk leh nghal mai a. Sum enkawl thiamloa min puh tute hnuaiah ni 15 lai treasury a kal thei ta lo. Bureaucrats leh intellectual-te an mangang ru hle a ni. Tha bik leh fel bik nia inzuar ten ni 50 erh awrh min hruai hnu hian kuthnathawk tute pawh an mangang ta hle a ni,” a ti.
MNF Adviser hian, thalai hna zawng mek mi sing rualten an hma lam huna an innghahna MSSSB thiah tumna a awm chu pawi a tih thu sawiin, “Result chhuak tur eng emaw zat a awm a. Dan ang thlapa advertisement chhuak tawh leh, form fill up tawh cheng nuai 17 chuang lut tawhte kha engtia hmalak zui tumna nge awm? Thalai hna zawng mek, mi sing telte hma bak, tha leh zung engzat nge an sen? Zangnadawmna an pe dawn em? MPSC-ah an hlanchhawng dawn em tih hi ka zawhna a ni,” tiin a sawi bawk.