Africa Cup of Nations champion lai Senegal an vanduai a, Moussa Niakhate chuan penalty shootout-ah a pet goal loh avangin inkhel boruak sang leh tang takah 5-4 in Ivory Coast lakah chak zawk zawnnaah an tlawm.
Thawhtanni zana Charles Konan Banny Stadium a inkhelah hian ram pahnihte hi 1-1 in an inhnehtawk a. Inrintawkna lian tak nei a inkhel Senegal in bul an tan that a pawimawh tih hria in nung takin bul an tan a. Minute 4-naah goal khung nghalin Sadio Mane ball cross chu Habib Diallo chuan goal-ah a khung.
Senegal in goal an khung belh thei lova, Mane hian goal an khung hnu lawkah hlauhawm taka ball chhuhsak tuma ‘tackle’ a siam avangin red card a hmu lo a vannei.
Ivory Coast in beisei pha chiah lo mahse an remchang neih an chhawr a. Huntawp dawnah penalty hmu in Franck Kessie chuan goal a khung.
Ivory Coast striker Sebastien Haller chuan, “Beiseina kan insiam a, knockout stage inkhel hmasa berah kan chak avangin kan tan kawng zau takin kan hawng a, group stage lam kan hawisan thei tawh a, kan hmalamah kan insawrbing thei.” a ti.
Ivorians hian Inrinni hian Mali leh Burkina Faso a chak zawk an hmachhawn leh ang.