Aizawl: Mizo Zirlai Pawl (MZP) chuan thuchhuah siamin, Meitei hel Arambai Tengol tana pawisa khawntu leh kan Zo hnahthlak unaute that vek tura titu Teresa Ningthoujam lakah nimin chhun khan Vaivakawn Police Station-ah an president H Lalthianghlima hmingin FIR an theh lut.
MZP chuan Teresa Ningthoujam chu chi leh chi inkara buaina chawk chhuak thei zawngin a tawng tih tar langin, “Meitei hel tana pawisa khawntu Mizoram University-ah Ph.D zirlai an awm hi tha lo kan ti hle a, hemi kawng a hma latu ber Teresa Ningthoujam chu a zirlai a chhunzawm theih tawh loh nan January 29, 2024 khan MZU thuneitute hnenah a rang thei ang bera hma la turin kan ngen,” an ti.
Manipur a chi leh chi inkara inhmuh thiam lohna hi reh thuai tura a duh laia, a ti punlun zawng a inhnamhnawih MZU a zirlai an awm chu an dem takzet tih tar langin MZP chuan, “Hetiang thil hi a thlen nawn tawh loh nan Meitei hel (Arambai Tengol) tan a pawisa khawntu leh hlantu Teresa Ningthoujam MZU a Ph.D zirlai mek lakah FIR theh luh a ni,” tiin OC-in an FIR hi a lo dawn thu an tar lang.