NBA a roster tha nei Milwaukee Bucks in an coach thlak in Doc Rivers an lalut a, mahse a hnuaia bul an tanna inkhelah erawh tlawm nghalin NBA champion lai Denver Nuggets in 113-107 in an hneh.
Thawhlehni zingah Nuggets in Ball Arena-ah Milwaukee hi an lo mikhual a, an thiampuipa Nikola Jokic chuan tun season a triple-double 14-na neiin a team hnehna a chanpui.
Serbian star hian point 25 score in rebound 16 leh assist 12 a nei a. Regular season-ah triple-double vawi 119 a neihna niin NBA chanchin a nei hnem ber palina a ni mek.
Rivers hian January 23 khan Bucks in coach Adrian Griffin an ban hnuah team a enkawl tan a, tlawm nghal mahse beiseina sang tak a neih thu a sawi.
“A pumpui a thlirin ka lung a awi a, chak tuma khel kan ni tih a hmuh theih a, hmalamah beiseina tur a tam.” a ti.
Bucks tan hian star player pahnih Giannis Antetokounmpo leh Damian Lillard te chuan point 29 leh 18 an score a. Lehlamah Denver tan Jamal Murray chuan point 35 a score ve bawk.