Premier League club Crystal Palace in season chawhnu lam atan team thuam chak tumin ke an pen a, Colombia right-back Daniel Munoz chu an lalut.
Kum 27 mi hian Belgian club Genk atangin London club hi a zawm a, a club thar hnenah hian kum thum contract ziakin kum khat a ziah belh theihna a nei.
Munoz hian tun season-ah league game 17 khel tawhin goal nga a khung bakah midang khung tur vawikhat a siamsak tawh a. Premier League atang ngaihventu mumal tak a nei tih a chian hnuah insawn ngei a duh avangin tunhnaiah training a zawm lo tawh.
Colombia tana vawi 23 khel tawh Munoz hian kum 2021 khan ram tan a inkhel tan a, kum 2020 khan Genk a zawm kuminah Belgian Cup an lakna kawngah tha a thawh ve bawk.
“Crystal Palace ka zawm thei hi ka lawm a, an tana inkhel tura khelmual luh hlan ka nghakhlel tawh.” tiin Munoz chuan a sawi.
Palace hian midfield lam pawh thuam chak an tum a. Kum 19 mi midfielder Adam Wharton lalut turin inremna an nei a, Pound maktaduai 22 vel a ni dawn niin an sawi.
Blackburn academy chhuak Wharton hian first team tan vawi 51 a inkhel tawh a, tun season-ah match 26 khel tawhin goal hnih a khung tawh bawk.