Aizawl: Congress MLA C Ngunlianchunga’n ZPM sorkar chu Mizoram chhim lam hmusitah a puh.
Thawhlehnia Congress Bhavan, Siaha-a inkhawmah C Ngunlianchunga, MLA chuan thu sawiin, ZPM sorkar hian chhim lam hmusit hlea a hriat thu a sawi a. “Minister ni ve awm tak takten minister dinhmun an chang pha lo hi a pawi ka ti a. Chhim lam bial hmasawnna ka ngaih pawimawh anga an ngai pawimawh lo hi pawi ka ti hle,” a ti.
Mite an sawi thin danah chibil politics khela chhim lam ringawt buaipui anga an puh chu C Ngunlianchunga chuan, “Mahse, Vairengte atanga Tawngkawlawng hian hmasawn se, chhim lam chauh ni lovin ram pumah hmasawnna hi rualkhai takin kal se ka duh vang zawk a ni,” tiin a sawi.
District council sum pek dan thlir letin Congress sorkar chu chhim lam tan an hlu hle a, MNF nena khaikhin chi pawh an nih loh thu sawiin Congress MLA chuan, “Tun dinhmunah ZPM hian helam ngaihsak tura nihna an pek san ber chu Adviser to Chief Minister (i/c Health) a ni a. Health minister pawh ni lo, CM adviser-a an dahte hi awmzia a awm lo hle,” tiin, ZPM sorkar chu chhim lam a hmuh hniamzia a lang chiang hle tih a sawi.
C Ngunlianchunga chuan ZPM party-te hian BJP tanpuina an dawng ngei nia a lan thu sawiin, “Mizo upaten, ‘pan lovah tho a fu ngai lo’ an lo tih thin kha a dik viau awm e. An hla key lakna a sang hle mai a, an inzawrh dan angin an awm em tih te kan thlir ang a. Anmahni budget siamte kan thlir ve phawt ang a. Mizo mipui rin ang an ni dawn em tih kan thlir ang. Mipuite beisei an pha lo a nih chuan kan paih leh mai tur a ni,” a ti bawk.
He hun hi Zodintluanga Ralte, Ex-Minister; PC Lalthanliana, Ex-Minister; Lalrindika Ralte, Ex-MLA leh Laltlawmlova Chinzah, Ex-MDC ten an tawiawm a ni.