- Mahmuaka Chhakchhuak
Kar hmasa lawkah khan Aizawl Bawngkawn a Greenwood Hospital thlang kawngpui kamah hian ka chuanna tur lirthei nghakin ka thu reng mai a, chutia ka thut lai chuan Vairengte lam atanga rawn chho Sumo chu ka hma zawn, kawngpui lehlamah chuan a rawn ding a. Mi pathum hi chhukin thawmhnaw an nei nual bawk a, kawngpui sirah chuan inrem thain Taxi an chang ta a. Ka chuanna tur motor lah chu ka beisei aiin a rawn thleng har daih mai a, chumite chevel chu ngawi rengin ka thlir ta reng mai a.
Nakin deuhah chuan chhak lam atangin Taxi pakhat hi a rawn tlan thla a, an lo phar a, a ding det a, anni chuan ‘Brigade lamah min ve drop thei em?’ an ti a, taxi khalhtu chuan ka hman lo tlat mai tiin a tlan tlang a. A hnuah chuan taxi pakhat hi a rawn tlan thla leh a, an lo phar lehin an kal duhna hmun an han sawi chuan taxi khalhtu chuan ka hman lo tlat mai a tia tlan leh mai a tum lai chuan a ding leh ta zawk a. An hnenah chuan ‘Taxi dang koh sak in duh em’ a ti a, anni chuan duh e an tih avangin a thianpa (ni turah ka ngai a) chu a han call nghal a, a ni chu a lo remchangin a rawn kal nghal mai bawk a. Tichuan, minute hnih khat hnu lekah chung khualzinte chuan an bungraw neih ang ang nen chuan an duhna hmun lam chu an pan ta a.
Chutianga an inbe vel chu ngawi rengin ka thlir a, kan inhlat vak loh bawk avangin an tawng pawh chu a hriat theih a, an sawi zawng zawng pawh chu ka lo hre ve vek a. Chutia hlim taka an duhna hmun lam an pan pawh chu thinlung taka lawmpui chung chuan kan thlir a, kawngkawia an tlan liam thlengin ka thlir a. Ka ngaihtuahna pawh an hnenah a awm zui reng a, ka lawmpui dan hi hre ngat sela chuan min chibai duh ngei te hian ka ring bawk a.
Taxi khalhtu fel leh fel lo hi keimah ngei pawh hian ka lo tawng ve nual tawh a, tumkhat phei chuan hmeichhe kum upa lem lo tak hi taxi khalhtu pakhat hian a duh lo chung a phur lui tawhin taxi tlan lai atanga zuanthlak tum lai hi ka hmu tawh a. Pakhat leh pawh taxi khalhtu chuan a tlankualpui avanga a beisei aia tam pawisa a dil avangin a neih daih lo chu an thinrim inhau lai ka hmu tawh bawk. Taxi khalhtute hi an sual vek lo a, an fel vel bawk lem lo tih chu nangni pawhin inhre ngeiin ka ring a, sawi tur in hre ve ngei pawhin ka ring. Dik tak chuan khualkhua atanga Aizawl rawn pan a, taxi khalhtu fel vak lo tawn chu thin a rim duh lehzual a, taksa chauh leh la hahdam hma si a thinur chu a hun lo ve bawk avangin hriatreng a ni duh bik bawkin a rinawm.
Taxi chauh niloin lirthei dang reng reng, a bik takin mitin ti mai ila mipuite phur chi ang hi chu a khalhtu fel leh fel loh hi an inthlau duh hle mai a, an lirthei fai that leh fai that loh lam pawh a ni lem lo. A khalhtu hawihhawm leh hawihhawm lohte hi an danglam em em thin. Lirthei khalh laia meizial pak khu luih luih chi an nih phei hi chuan a thinurthlak viau thin a, an hawihhawm a, an mi phurhte biak siam siam an peih emaw an bungruate hlang a, an mawng a zan viau hi chuan fel kan ti leh em em mai bawk a. Lirthei kan chuan hian beisei dang tehvak kan nei ngai lem lo a, kan duhna hmunah tha takin min thlen sela, an lirtheia kan chuan laiin harsatna min siam lo sela tih emaw zawng a ni mai. Chungahte chuan lirthei khalhtu fel leh fel lem lote chu kan hre reng bik thin a ni.
Kan han sawi tak, Taxi khalhtu fel takin a thianpa a biaksak chanchin pawh hi a ngaihnawm ka ti a, a mi phurhte hian chuanman an pek hian an theihnghilh zui nghal mai ka ring chiah lem lo. An lawm dan tur hi ka suangtuah thiam chiah lo nain an lawmna hi a sang ngawtin ka ring. Dik tak chuan ‘ka hman lo’ tiin tlan tlang mai sela vui theihna tur engmah a awm chuang lo. Chuti chung chuan kha Taxi khalhtu kha chuan a thiante chu an remchan leh remchan loh biain a koh sak a, a tihtur bak a ti tiin sawi ila a dik thei tho awm e. Chu a tihtur bak a tihna chu midang tan malsawmna a ni thung si a, a tan hian thil pangngai leh a tawn fo tawh pawh a ni mai thei nain chu malsawmna dawngtute tan erawh lawmna nasa tak a thlen sak thung si a. Vawi tam tak lirthei tlan lai hi ka pharin min phur duh lotu hi ka lo tawng nual tawh a, vui theihna tur engmah ka nei lo. Min phur duh a, kan kianga rawn ding a, an lirtheia han chuan chiah hi a lawmawm zia chu sawi thiam mai theih pawh a ni kher lo ang. Khawzawl Kawnzar veng atanga Middle School II, Vengthara ka kal laia u Patea’n a thirsakawra min phurh thinte kha ka hre chhuak uai uai a, ka lawm theih thin zia kha vawin thleng hian ka la hrereng thin.
Midang tana malsawmna nih hi thil har tak pawh a ni lem lo a, thil awlsam leh harsa lo taka midang tan malsawmna kan lo nih theih dan pawh hi kawng tam tak sawi tur kan hria ang. Chutianga midang tana malsawmna ni tura thil holam tak angah pawh kan tih mai hi tu tan pawh a tha mai a, mihring pangngai chuan a ti ngei tur pawh a ni. Tun hma lama Shillong kal a, kawngpui chhe laia Vaiin min han puih hnua pawisa min dil leh thin ang kha chu mi pangngaiah chhiar tel theih a ni kher lo ang a, kan Mizo zia leh kan kristianna atang hrim hrim pawh hian midang tana malsawmna tura kan theihna apianga kan thawh a, kan tih hi keimahni tan ngei pawh malsawmna a ni tih kan hriat nawn a tha ngawt mai. Kha taxi khalhtu ngei pawh khan a thiltih that kha a tan chuan hote pawh a ni mai thei e, nimahsela midang tana malsawmna a nih kha amah ngei pawhin malsawmna a dawn phahna tur a nih ngei ka ring tlat a ni.
Kha Taxi driver kha hmuh leh a, chibai ka chak ngawt mai. Midang tan malsawmna lo ni zel rawh se.