India hmarchhakah hian hnam chi hrang hrang, ze in ang lo tak tak kan chengin hmun tam takah phei chuan kan inchen pawlh nasa hle. Ze hrang hrang, hnam hrang hrang te chuan kan chenna ram theuh kan humhalh na hle vek a. Ramri thu ah pawh ram inchuh kan ngah hle bawk. Hetiang kan nih avang hian hmanlai atangin ramri thubuaia buaina pawh nei reng kan ni. State ramri fel thlep thlawp a awm hleih theih loh avangin rik hluai chang pawh kan ngahin tharum han hman deuh a ngaih chang pawh a tam mai. Nikum hmasa lawkah pawh Vairengte daiah Assam police an thih phah nual nghe nghe kha.
Hetianga buaina hi kan hma lamah hian kan la nei fo dawn niin a lang a. India ram state vek kan ni a, buaina tak takah chuan central a rawn inrawlhin a buai thui tak tak theih loh kan ti thin. Dikna chen chu a awm. Mahse, India ram hi federal govt kan nih angin state himna hi thui tak kan kutah dah a ni a. Central hi state leh state karah inrawlh tur mah nise state hi zahawm leh him thama kan in siam ve hi chu a ngai. Tunhnai chho ah kan thenawm state nen inngur kan nei tam viau a. Assam lam kan ep a, Manipur buaina avangin kan unaute thlavang hauhin an state nen chhungril takah kan in ep bawk. Chutih rualin kan thenawm state te hi keini aia ngialnghet leh hausa zawk an ni a. Sum leh pai nei zawk na na na chuan kan boruak vang hi ni maw, an state sawrkar police an thuam chak thar nasa hle. Assam lam chuan commando battalion 5 din belhin hmanni lawk khan passing out parade an nei a, union home minister hialin he hun hi a hman pui a. Manipur lam pawh an state security thuamchakin commando battalion an din belh thar a. Tunlai hian commando 2500 laiin training an nei mek bawk a ni.
Hetiang karah hian keini hi sum leh pai harat nen, kan state police hi tun dinhmunah hian engnge an an ang le. Kan police battalion neih ve panga te hi an dawrawm hle in a hriat a. Battalion puitling pawh hi an ni phak em aw tih tur an ni a. Pension tawk an awm ve reng a. Boral tawk an lo awm ve reng bawk. Harsatna avangin police kan lak belh hleithei lova. Battalion te hi an thawl em em tawh hlawm a. Sipai 400 vel bak battalion ah hian an awm pawh a rinawm loh hial a ni. Ralthuam lamah pawh hian han neih belh thar em em an neih hriat ani lova. Thenawm state police lakah chuan an number in an tlem em em sa a ni.
Eng buaina pawh thleng se hmachhawn ve thei tawka kan police te kan dah a ngai a. State security kan siam that hi a pawimawh a. Ram hi hmasawn tur pawhin a him a ngai. Tunhma kha chuan police nei tha kan inti thin kha a ni a. Tunah erawh chuan kan dinhmun hi thenawm state lakah hian han in duh tur kan awm vak lo hmel hle mai. Sum leh paiah harsa mahila state himna kan ngaihtuah hi a pawimawh a. Mihringin him loa a inhriat hi chuan lungmuanna a awm lova. Chutiang chiah chuan kan state police te hi mipui hian an rin ngam tawk ani kan tih turin i thuamchak ang u.