Aizawl: ZPM General Headquarters Executive Meeting nimina Republic Veng Community Hall-ah neih chuan an party hruaitu thlan hun tur an ngaihtuah a. ZPM General Headquarters inthlan hun atan February 15, 2024 an ruat.
ZPM President Lalliansawta kaihhruai executive meeting-ah hian, chief minister, fInance changtu ni bawk, Lalduhoma chuan tun hnaia sum harsatna chungchanga thu dik tawk lo darh chu pawi a tih thu sawiin, treasury khar a nih loh thu leh sorkar hmasa atang sum chet vel dan fel lo inkhaidiat chho nghawng avanga sorkar sum harsatna thlen chhoh dan chungchang a sawifiah.
Lalduhoma chuan sum harsatna chingfel tura theihtawp an chhuah mek thu leh, zawi zawi a insiamthat chhoh zel theih a beisei thu a sawi.
Meeting chuan hun rei lote chhunga chief minister Lalduhoma kaihhruai Mizoram sorkar kal dan lungawithlak an tih thu leh, an kal leh zelna turah duhsakna a hlan a ni.
Meeting-ah hian chief minister bakah minister-te leh MLA te nen member 317 an kal a ni.