Aizawl: MZP chuan nimin khan ramri hung bakah Chin state leh Mizoram state zalen taka inkalpawhna, Free Movement Regime (FMR) tihtawp tumna duh loh lantir nan, Prime Minister Narendra Modi leh Union Home Minister Amit Shah lim an hal.
MZP chuan, “Zofate hi kan duh reng vang ni lovin, international boundary pathum – India, Myanmar leh Bangladesh-ah thendarh kan ni a. India-ah pawh state hrang hrangah kan inthen darh bawk. Zofate min thendarhtu ramri hi Zofate rawnna leh remtihna awm lova British-in a siam a ni,” tiin, Zofate tan chi a nih loh thu an sawi.
Zofate hian ramrite hi an rilru tak taka an pawm ngai loh thu sawiin, “Mizoram NGO leh political party tinte pawhin thil tumah ‘Zofate rorelna pakhat hnuaia awm’ tih hi kan ziak lang hlawm a. Chutih laiin, tun hnaiah India sorkar-in FMR tihtawp leh ramri hung an tum hi pawi kan ti hle a, dodal zel kan tum,” tiin, dan phal loh ruihhlo leh khap thilte chu ramri hung kher lova tihrem dan dang ngaihtuah turin central sorkar an ngen.
Hemi chungchangah hian Mizoram Chief Minister Lalduhoma leh Home Minister K. Sapdanga chu theihtawpa hmala turin a lo ngen tawh tih sawiin, “Prime Minister Narendra Modi hnenah memorandum theh luh tawh niin, Union Home Minister Amit Shah bakah vice president leh union home secretary-te a copy pek an ni bawk. Chutih laiin, ceneral sorkar atangin thulh tumna emaw, engmah thu lawmawm dawn a ni lo va, ramri hung tur hian ngawrh takin inbuatsaihna a kal mek niin hriat a ni. Chuvangin, MZP chuan a tul angin hma a la zel dawn,” an ti.