Germany a second division a khel club pahnihten German Cup semi-final luh an inchuh a, hun pangngai leh hun pekbelh a an inhnehtawk hnuah 4-3 in penalty shootout-ah Fortuna Dusseldorf an vannei zawk.
Thawhlehni zanah Millerntor-Stadion-ah 2. Bundesliga hmahruaitu ni lai St. Pauli in Fortuna Dusseldorf an mikhual a. Ni thum kalta a mikhual team ni chunga an hneh tawh club lakah hnehna chan nawn an tum.
Mikhual team erawhin an tlawmna nawhreh nan huntha hman an tum thung a, Westphalian team hian minute 38-naah hma an hruai. St. Pauli goalkeeper Sascha Burchert chuan Vincent Vermeij a ti tlu a, Vermeij-a’n penalty hmu in goal-ah a khung.
St. Pauli in kum 2006 hnua a vawikhatna atan Cup semi-final luh an tum ve bawk a, minute 60-naah penalty atang tho an si phurh sutin Marcel Hartel chuan a spot kick a pet goal.
Hun pangngai a goal a luh belh loh hnuah extra-time ah St. Pauli keeper Burchert a chesual a, a ball man ngheh lo chu Ao Tanaka chuan goal-ah a khung a. Mikhual team in chak an hnaih.
Nimahsela hun pekbelh tawp hma in Carlo Boukhalfa chuan St. Pauli si phurh sutna a tauh lut a, penalty a chak zawk zawn a ngai.
Penalty shootout ah Dusseldorf keeper Florian Kastenmeier chuan vawi hnih save in a team in hnehna an chan theih phah a. Kum 28 hnua a vawikhatna atan Dusseldort in German Cup semi-final an khel dawn.
Hertha Berlin, Kaiserslautern, Bayer Leverkusen, VfB Stuttgart, Saarbruecken leh Borussia Moenchengladbach te zing ami an hmachhawn leh ang.