Arsenal in Premier League title inchuhna kawngah hmahruaitu ni lai Liverpool nena an inkar an ti zim a, Nottingham Forest lakah 2-1 in hnehna an chang.
Thawhlehni zana The City Ground a inkhelah Forest in theihtawp chhuahin Gunners ven an tum a, second half-ah an tlin loh hun thlengin Arsenal forward-te an hlauhawm.
First half-ah Gunners in Forest tlarhnung sut tlang harsa ti mahsela minute 65-naah an huntha neih an chhawr a. Gabriel Jesus chuan ball tha a hmuh chu Matt Turner-a goal ah a khung.
Minute sarih hnu lekah remchang an nei leh a. Forest tlarhnung chesualah Gonzalo Montiel chuan Martin Odegaard lakah ball a hloh a. Jesus nen inkawpin Bukayo Saka goal khung tur an siamsak.
Goal hnih a hma an hruai hnuah erawh Gunners an inthlahdah a, a pawi teuh. Forest substitute Taiwo Awoniyi chuan huntawp hma in goal khat a khung.
Gunners hian Liverpool hmahruaina point hnihah an tihniam lailawk a, manager Mikel Arteta chuan kartawp a Liverpool nen an inkhel tur thlir telin, “Boruak tha leh inrintawkna kan neihna turin kan chak zawn a, kan khelhthat zawn a ngai. Kartawp inkhel tur hi a pawimawh dawn hle a, hei vang hian kan inbuatsaihna pawh a tha thei ang ber a nih a pawimawh.” tiin inkhel zawhah a sawi.