India-a sum hman dik loh chhuitute chuan ram chhunga eptu hruaitu lawk ber pawl chu Jharkhand chief minister atanga a bân hnu lawkah an man.
Jharkhand Mukti Morcha (JMM) party hruaitu, Hemant Soren-a hi ei rua puh a ni a, amah chuan a pha thung.
Nilaini zan khan Enforcement Directorate (ED)-in darkar sarih zet thu an zawh fiah hnuah an man a ni.
A party chuan Transport Minister Champai Soren chu khawchhak state-a chief minister atan a ruat nghal.
Soren-a hian an manna chu Supreme Court-a a khing let nghal a, politics thil avang mai mai niin a sawi a. A khinna hi Zirtawpni hian ngaihtuah nghal a ni ang.
Ani hi India-a sorkar laipui hnuaia awm agency-ten chhuia an man thar ber a ni.
Soren-a thubuai hi Kharkhand khawpui, Ranchi-a ram a neih kaihhnawih thil a ni.
ED hian Indian army ram a ni a, dan lovin a leisak niin an puh a ni.
Soren-a chuan an puhna hi phain a thil neihte chu ‘dik lo taka nei’ angin an puh mai mai niin a sawi.
ED thuneitute chuan a hmain thu zawh fiah tumin Soren-a hi an ko fo tawh a, a inlan duh ngai lo niin an sawi.
Thawhtanni khan Delhi-a Soren-a chenna inah an pan a, ‘a bo’ nia sawi a ni a. Agency chuan a ina a pawisa Rs. maktaduai 3.6 leh car an hrensak.
A tukah Soren-a hi Ranchi-ah hmuh a ni a, Nilainiah agency hmaah inlanin thil a sawi dawn niin a sawi.
Nilaini tlai atang khan Ranchi-a chief minister chenna in leh ED pisa atanga metre 100 bialah curfew puan nghal a ni.
A hnu darkar reilo teah Soren-a hian a bânna a thehlut zui a, amah thlawp tlat thin, Champai Soren-a chu amah thlaka chief minister a nih thu puan nghal a ni a. Zanah Soren-a hi man nghal a ni.
JMM chuan Soren-a chhuina chu politics thila beihna mai mai niin an sawi.
Party hian sorkar laipui, Prime Minister Narendra Modi-a kaihhruai BJP sorkar chuan inthlanpui hnaih mek laiin a hnuaia agency-te hmang tangkaiin eptu hruaitute a bei niin an puh a. BJP erawh chuan politics engmah a inrawlh lo niin an sawi thung.
India-a eptu party lian ber, Congress pawhin Soren-a man hi an dem thu an sawi a. JMM hi Congress kaihhruai tangrual pawl, BJP kaihhruai National Democratic Alliance (NDA) beih tuma intel khawm, INDIA-a tel ve an ni.
“Ei ruk kawng zawh mek BJP hian mipui rorelna tichhe zawngin an campaign a ni,” tiin Congress hruaitu, Rahul Gandhi chuan X-ah a tar lang.