BSF constable bân, social media-a a sipai tan laia an chaw dawn chhe lutuk a thehdarh avanga mi hriat hlawh tak ni mek, Tej Bahadur Yadav chuan Lok Sabha inthlanpui lo awm turah hian Prime Minister Narendra Modi chu Uttar Pradesh-a Varanasi-ah a khing ve dawn.
Thuthar lakhawmtute a kawmnaah Yadav chuan sipaia ei rukna nasa lutuk tihbo a nih theih nan inthlan a chuh ve dawn tih a sawi.
Rewari, Haryana-a cheng, Yadav chuan, “Modi-a lo lal hnuah ei rukna tihbo tumin ka bei a; mahse, ka hlawh chhuah chu sipai atanga bân a ni. Tunah chuan vantlang hmaa dingin ei rukna nuaibo ka tum tawh zawk a, mipui pawhin min thlawp ngei ka beisei,” tiin Inrinnia Facebook-a thu a post-ah a tar lang a. Facebook-ah vek thu dang a tar lanah ‘Sipai leh chowkidar inbeihna’ tiin a sawi bawk.
Rewari-a Rata Kalan khua, Tej Bahadur hian January, 2017 khan social media-ah BSF sipaiten an chaw dawn chhe lutuk a post darh a. He a video hi mi nuai 90 velin thlirin nuai 4.4 velin social media dangah ni thum chhungin an thawn chhawng hman a. April 19, 2017 khan BSF atanga bân niin pension pawh an pe lo a ni.
Bân a ni hi Punjab leh Haryana high court-ah petition thehluta khingin a pension pawh a dil a; mahse, tun thlengin a thu thehluh hi tihkhawtlai (pending) a la ni.
Tun hnai lawk khan a fapa neih chhun, kum 22-a upa, Rohit chu a pistol hmangin a inkap palh a, a sun zui a ni.