Aizawl: Central YMA-in ram chhung leh rampawna thalai hnathawk tur thawn chhuak thin agency-te chu thalai hlawhtling ngei tur leh rintlakte chauh thawn thin tur leh fimkhur taka hma la thin turin an chan tih an president, Lalhmachhuana’n a sawi.
Central YMA chuan nimin khan Central YMA Committee Room-ah employment agency-te kokhawmin ram danga hnathawka chhuakte harsatna tawh chungchang leh thawhho dan turte an sawipui a, agency hrang hrangte hian Mizo thalai hnathawk tura ram danga an thawn chhuah dan kalhmang leh harsatna an tawh te an sawi a, ram danga hnathawka awmten harsatna an tawh dante pawh sawi lan a ni bawk.
Inhmuhkhawm kaihruaitu, Central YMA President Lalhmachhuana chuan agency-te chu document dik tak hmanga hnathawk tur thawn thin tur leh kumtlinglote thawn lo turin an ngen a, an thawn chhuahte pawh en zui zel tur leh an harsatnate chin fel kawngah mawhphurhna la zel thei turin an chah a ni.
Central YMA president chuan thalai hna zawng lai ram danga hnathawk turte pawh mahni nihna dik tak leh document dik chauh hmang turin a chah bawk a, a theih angin Central YMA-in mumal zawka agency-ten hna an thawh theih dan turah ngaihtuahna an sen tur thu a sawi bawk a ni.