Bihar-ah Surat lam pan Chhapra-Surat Tapti Ganga Express pindan 13 chuan nimin tuk khan Saran district-a Gautamsthan railway station bulah a kawng zawh sualin a chesual a, mihring thi leh hliam erawh an awm lo hlauh.
North Eastern Railway-a Public Relation Officer Sanjay Yadav chuan hliam tanau deuh tak tuar 11 erawh an awm tih a sawi a. Chhapra-Gorakhpur inkara rel tlan erawh hun eng emaw chen a khaihlak tih a sawi.
PRO chuan rel hi a hlui lam a ni a, Chhapra station atanga zing dar 9:00-a chhuak chu minute 45 hnuah a chesual ta tih a sawi a. Mita hmutute chuan a khalhtuin kawng chhia a hmuh chuan emergency brake a hmang a, a pindan thenkhatin a kawng a zawh sual phah ta tih an sawi.