United Liberation Front of Asom (ULFA-I) leh venhim hna thawktute chu nimin tuk khan Arunachal Pradesh-a Khamdu khua, Changlang district-ah nasa takin an inkap nia hriat a ni.
Chanchinbu miten an sawi dan chuan ULFA helho hian helho beia thawk chhuak nia an hriat venhim hna thawktute an hmuhin an kap hmasa a, rang takin ram hnuai lamah an tlan lut lehnghal.
Silai ri hria hian khuaa mite pawh an thawh phah a, a hnuah an khaw hnaihah helho hi an awm tih an hriat phah.
Arunachal lama inkahna a thlen mek lai hian Assam sorkar chuan ULFA hel hruaitute hi inremna siampui dan a dap mek zel a, an Commander-in-Chief Paresh Baruah pawh an dawr zingah hian a tel nghe nghe.
Assam Minister Himanta Biswa Sarma chuan, “Bohag Bihu chho velah hian sorkar chuan Assam mipuite hnenah chanchin lawmawm tak a puan theih a beiseiawm a. Assam Accord-a Clause 6 hnuaia high-powered committee thurawn angin thil kalpui mek zel a ni a. Hei bakah hian Home Minister Amit Shah chuan sorkar laipui tan pawha thatna awm thei turin thil kalpui a duh bawk a. ULFA Chief Paresh Baruah hi remna zawnga inbiakpui atan Bodo Accord siam hnuah khan dawr a ni tawh.