Tanzania rama pawna inkhawmna hmuna mihring innek buaina a chhuaka a, mi 20 vel thiin eng emaw zatin hliam a tuar bawk.
Inkhawm huaihawttute hi Pentecostal an ni a, an ram hmar lam, Moshi khuaah niin Inrinni zan inkhawmah he chhiatna hi a thleng a. Moshi district commissioner Kippi Warioba chuan inkhawmte hi dawhsana malsawmna dawnga hriat thih hmasak nih inchuhin an innek buai niin a sawi.
Tanzania President John Magufuli chuan chhiatna thlenga thite a tawrhpui thu sawiin hetiang punkhawmna lianah chuan venhimna tha zawk siam a tul tawh thu a sawi bawk.
Inkhawmah hun hmangtu hi Pastor Boniface Mwamposa a ni a, amah hi ‘zirtirtu’ tia insawi a ni a. Innek buainaa tel ve thenkhat chuan Mwamposa hian za tel inkhawmte chu malsawmna hriat thih dawng turin a sawm a, an bawr ta huk niin an sawi.
Inkhawma tel ve pakhat chuan thil thleng chu a rapthlak tak zet thu a sawi a. An tluk hnuah chuan an hnunga miten an rap a, an tlu zel a, an innek a, an inpal zui niin a sawi bawk.