Kenyan khawpui, Nairobi-a na taka gas puak avangin mi pathum an thi a, mi 300 dawn hliam tuar an awm bawk.
Embakasi district-ah gas phur lorry chu Ningani zan dar 11:30 (India-a Zirtawpni zing dar 2:00) velah a puak a, ‘na takin a kang zui’ tih sorkar thupuangtu chuan a sawi.
In, sumdawnna hmun leh car eng emaw zat a kang chhia a, video-ah chuan kang nasa takin flat awm khawmna laiah a inhlap nasa hle.
A hmun hi khar nghal a ni a, chhui zui nghal niin a puah chhan hi hriat theih a la ni rih lo.
A vengtu pakhat chu man a ni tawh nia sawi a ni.
Thi zingah hian naupang a tel niin Embakasi police chief Wesley Kimeto chuan a sawi a, thi hi an la pung thei niin a sawi bawk.
Mi 271 lai damdawi inah dah an ni tih thuneituten an sawi a, an zinga 25 vel chu naupang an ni.
Nairobi county Governor Sakaja Johnson chuan a tam zawk hi chu enkawlna pek an nih hnuah hawtir leh an ni tih a sawi a, mi 39 erawh an dinhmun a that vak loh avangin enkawlna tha zawk dawng turin hmun dangah thawn an ni.
Mwaura-a chuan kang inphuh chhuak chu ‘a dah zau hle’ tih a sawi a, gas bur thlawkin thawmna leh puan dahna in a fuh a, a kang zui tih a sawi.
Apartment complex eng emaw zat a man kai bawk nia sawi a ni.
A hmututen tual chhung chanchinbute hnenah a puah zawh hian a nghing dur dur niin an sawi.
Hliam tuar tam zawk hi thaw tha thei lo an ni a, an zingah hian naupang 25 vel an tel niin Standard chanchinbu chuan a ta lang.
Hliam tuar zinga pakhat, Boniface Sifuna chuan, “Tlanchhiat ka tum laitakin gas bur puakin min rawn tuam hlup mai a ni,” tiin Reuters news agency hnenah a sawi.
“Ka hma maia puak hi a ni a, min paih thlu dawrh a, meiin min rawn tuam nghal hlup a, ka vannei a, ka tal chhuak thei ta hram a ni,” a ti.
Thil thleng hmutu pakhat chuan ‘thil puak na tak, mei inphuh chhuak nasa, mipui hlau thawm leh tlanchhia, a puah leh hlau’ ten a tuam vel niin Nation chanchinbu hnenah a sawi.
Gas puahna bul lawka cheng, Nation-a thawk chanchinbu mi chuan a chhehvela in zawng zawngte chu chhuahsan vek a ni tih a sawi.
Kenya Red Cross chuan ‘kang thelh tum hian chawl lovin’ thawktuten an bei niin social media-ah an tar lang.
Sorkar thupuangtu, Mwaura chuan gas puahna hmun hi thunun tawh a ni a, command centre dinin chhanchhuah hna thawh vil reng a ni tih a sawi.
“Kenyan-te chu thil thlenna hnaiah kal rih lo tura tih an ni a, thil tichhe tlem thei ang bera chhanchhuah hna hi thawh a ni,” a ti.