National Tobacco Control Programme (NTCP), Kolasib chuan DC Circuit House Conference Hall, Kolasib-ah nimin khan Kolasib khawpui chhunga kohhran hrang hrang hruaitute pualin vaihlo that lohzia zir hona training an buatsaih.
NTCP State Nodal Officer Dr H. Lianthangpuia chuan he hun hi hmanpuiin, Mizorama zuk leh hmuam hluar ta lutuk chu veiawm a tih thu leh kohhran mipuiteah zirtirna nasa zawk neih tul a tih thu a sawi a. Global Adult Tobacco Survey (GATS), 2016-17 data angin Mizoram hi tun dinhmunah India ramah vaihlo hman nasat lamah pahnihna kan ni mek tih sawiin, hei vang hian a kaihhnawih natna hrang hrang, a bikin cancer-ah pawh kan sang hle a ni, a ti a. Vaihlo that lohzia inzirtirna leh zuk leh hmuama fihlim tura hma laknaah kohhran hruaitu kal khawmte chu thawh hopuiah a sawm a ni.
He hun hi Kolasib Sr CMO cum District Nodal Officer (NTCP) Dr RK Lalthlamuana chuan kaihruaiin, vaihlo dona kawnga tan lakpui turin kal khawmte a sawm a. Sylvia Zomuanpuii, Social Worker, NTCP Kolasib chuan hunserh a hmang a. NTCP State Consultant R. Lalremruata chuan Mizorama NTCP hma lakna hrang hrang tar langin, vaihloin hriselna a nghawng dan bakah, vaihlo khuahkhirhna dan (COTPA 2003) chungchang te a lem nen a zirtir a. Sawi hona hun tha tak hman a ni bawk.