Nepal ram tourism minister Rabindra Adhikari chu Pathibhara bul, Taplejung district-a a chuanna helicopter chesualah a thi tel tih Air Dynasty chuan a puang.
Civil Aviation Authority of Nepal thupuangtu, Pratap Babu Tiwari pawhin minister hi a chuanpui mi dang 6-te nen helicopter chesualah hian an thi vek tih a sawi bawk.
Adhikari leh a thuihhruaite hi Pathibhara temple-a pathian hnena an inhlan zawha Kathmandu lama an thlawk let leh, Chuhan Danda-a thlawhna tumhmun tur siam mek en pah tum an ni.
An awmna chin hriat a ni lo tih sawi a awm hnu lawkah Pathibara vela chengte chuan police hnenah helicopter tlaknaah hian kangmei nasa tak a awm tih an hrilh a, an chuanna ngei hi a lo ni.
Minister Adhikari hi pilot Captain Prabhakar KC, tourism entrepreneur Ang Chhiring Sherpa, security personnel Arjun Ghimire, Prime Minister thawhpui hnai tak Yubaraj Dahal, CAAN Deputy Director General Birendra Shrestha leh CAAN Engineer Dhruba Das Bhochhibhaya hova chuang an ni.
Taplejung Chief District Officer Anuj Bhandari chuan khuaa mite hian thil puak ring tak an hriat hnuah kangmei leh a khu an hmu zui niin a sawi.
Prime Minister office chuan Council of Minister-ten chhiatna thleng chungchangah hian Prime Minister chenna, Baluwatar-ah emergency cabinet meeting an nei nghal tih a sawi.