Arvind Kejriwal-a kaihhruai Aam Aadmi Party (AAP) chuan Congress nen dinna tur bial an inchan sem fel hnuah Delhi leh Haryana-a an candidate turte an puang ta.
Grand Old party hian ram khawpui berah hian bial thumah an chuh ang a, rorel lai hian bial liah an chuh thung dawn a. Rahul Gandhi-a Bharat Jodo Nyay Yatra boruak thlir chungin bial hi an inchan sem a ni.
AAP hian Delhi-a bial thuma ding tur hian an hruaitu hlun tak tak – Somnath Bharti (New Delhi), Sahiram Pehalwan (South Delhi), Mahabal Mishra (West Delhi) leh Kuldeep Kumar (East Delhi) te an dintir dawn a ni.
Haryana-a bial khat, Kurukshetra-a an chuh turah Sushil Gupta an dintir bawk ang.
AAP hruaitu hlun, Sandeep Pathak chuan, “State pangaah candidate 29 neiin inthlan hi kan chuh dawn a ni,” a ti.
“Heng kan candidate-te hi ngun taka thukhawma sawiho hnu leh kan chhut hnua kan thlan chhuahte an ni a. Bial tinah hian hnehna kan chang dawn a ni,” tiin party hruaitu hlun, Gopal Rai chuan a sawi bawk.
“AAP-in kan candidate atana kan thlan chhuaha khaikhinna ber chu hnehna an chang dawm em tih a ni a. BJP MP-te hian hna an thawk lo va, mipui zingah an tel lo va, AAP MP-te erawh chuan hna an thawk a, chhun leh zanah pawh vantlang banphakin an awm a ni,” a ti bawk.
Rai-a hian a vawi khat nan Schedule Caste candidate neiin East Delhi bialah an dintir dawn a, he bial hi general seat a ni nghe nghe a. “Kuldeep Kumar hi Scheduled Caste category a ni a, hei hi Delhi-ah reserve category huanga miin general seat a chuh vawi khatna a ni,” a ti.
Kumar-a hi politics-a chi leh chi inkar thil awm tihtawpna atana thlan chhuah a ni tih Aatishi chuan a sawi a. “AAP chuan vantlang tana thawk leh nungte chauh kan thlir a. An thiltih leh vantlang tana an thawh avang chauhvin candidate tura thlan hi a ni,” tiin a sawi bawk.