A vawikhat nan budget la pharh ngai reng reng lovin an pharh ta rup mai a! A engemaw zawng tak chuan lawmawm tak a ni. Ngaihtuah zui ngai tam tak pawh a awm ngeiin a rinawm. Kan ram kal zel dan tur thui tak hriltu tur a ni a, mipuiteah engti zawngin nge nghawng a neih ang tih pawh hriatthiam a la har rih viau.
Nimina budget a pharhnaah Finance changtu, CM ni bawk chuan 2024-25 chu inremchem kumah an hman tur thu a sawi a, ‘A bul tan nan kan sum hmanna te thlirin, tul baka kan hmanna nia hriatte tihtawp leh tihhniam kawngah hma kan la dawn a ni,’ tiin a sawi a, hei hian a lehpek budget awm dan tur thui tak a hril dawn a ni.
Tin, nimina bugdet pharh tak tam tak zingah hian ngaihtuah zui ngai tak pakhat lo lang ta chu, ruang phurh chungchang lo awm ta hi a ni bawk awm e. ‘Thingtlang lam mi khawsak harsa zualte khawpuia an thihin, an ruang phurh hawna atan Rs vbc 5 ruahman a ni a. Social Welfare dept kaihhruaina hnuaiah buaipui a ni ang,’ tiin tarlan a ni a. Hei hi mipuite tawrh tihzuauna mai tur nge, sorkar in ngaia neih tawh atan a duh tih pawh ngaihtuah zui theih tak a niawm e.
Sawi tur leh sawizui chak tak tak tam tak a awm ngei mai. Uluk taka ngaihtuah chungin sorkar thar budget hmasa ber hi mipui lamte pawhin i ngaihvenin, i thlirpui zui teh ang u.