- Ruata
India ramah hian Kia SUV te hian bu an khuar chak em em a. Tunah hian an SUV neih mek pahnih Sonet leh Seltos chu market lamah hma a sawn chho mek a ni a. Kia chuan SUV dang pathum chu kum 2024 atanga kum 2025 chhungin tihchhuah leh an tum a ni.
Kia hian Seltos leh Sonet hralh tlain, market lamah che tha viau lo se chu hetiang thutlukna hi an siam a rinawm loh a. SUV thar 3 lai mai an tihchhuah leh chhan tur hi India ram market-a beiseina an neih san vang a tih loh theih loh a ni. Kia chuan beiseina nen SUV thar pathum Clavis, EV9 leh Carnival thar te tihchhuah an tum a ni a. Carnival hi chuan a hming pawh kan lo hriat tawh niin tarlan tawh ang hian hei hi chu a version thar tur, a chi thar a ni dawn a ni.
Kia hi South Korea company hmingthang niin Hyundai nen pawh nasa takin an thawk dun a. Kia Sonet leh Seltos leh Hyundai Venue leh Creta te hian thil tam tak an intawm a. Tun dinhmunah India ram market-a SUV huanga hmun lailum luah tu an ni mek a. Mizoramah ngat phei chuan ‘sales’ a pung thur thur a ni.
- KIA CLAVIS
Lirthei huang angah chuan Sonet leh Venue compact SUV te hnuai lama awm tur niin Kia Clavis hian Tata Punch, Maruti Suzuki Fronx leh Hyundai Exter te a rawn el dawn a. He SUV thar tur hi South Korea kawngpuiah chuan vawi duai lo an enchhin lai hmuh tawh a ni a. Internal Combustion Engine (ICE – petrol leh diesel khawl pangngai) leh electric khawl duhthlan tur a awm ang a, hei hi brand-in hybrid powertrain an hman hmasak berna a ni thei bawk a ni. ICE version hian engine duhthlan tur hrang hrangah Venue a rawn tawm ang a, Venue hian 1.2L naturally aspirated khawl leh 1.0L turbo petrol khawl te a nei mek a. Electric version-ah hian battery pack 30-35kWh vel dah a nih a rinawm a, front-axle-ah a electric motor hi dah a nih a rinawm bawk a ni.
- KIA EV9
Kia hian kumin hian kan market-ah EV9 3-row electric SUV hi a tlangzarh dawn a. EV6 te pawhin an hman ang, e-GMP skateboard architecture nghahchhana duan a ni dawn a. Electric khawl chi hrang pathum duhthlan tur a awm ang a. Battery pack duhthlan tur pahnih –76.1kWh leh 99.8kWh te a awm dawn a ni. A hmasa zawk hi RWD standard version a nih laiin, a hnuhnung zawk hi RWD long-range leh AWD variant pahnih nen a awm thung a. RWD long range model, rear axle-a electric motor nei hian 150kW power leh 350Nm torque a pechhuak thei a. A chak zawk 160kW/350Nm, single electric motor duhthlan tur a awm bawk a ni. AWD version hian electric motor pahnih a nei a, 283kW & 600Nm a pe thei a. Vawikhat charge full in certified range-ah km 541 lai a tlan thei dawn a ni.
- KIA CARNIVAL THAR
Kia hian official takin New gen Carnival MPV hi kum 2024-ah India market-ah tlangzarh a nih tur thu a puang tawh a. Company hian Carnival thar hi KA4 RV (Recreational Vehicle) concept angin kum 2023 Auto Expo-ah an lo pholang tawh a. Model thar tur hi a hma aiin a lian ang a, cabin chhung pawh a zau nuam dawn viau a ni. ADAS suite tharlam ber a hmang ang a, adaptive cruise control, autonomous emergency braking, lane assist, leh blind spot monitoring te bakah thil dang tam tak ADAS-ah hiana awm dawn a ni. Model thar hian 200bhp power leh 440Nm torque pe chhuak thei 2.2-litre diesel khawl a neih beisei a ni a. Transmission hi 8-speed ‘Sportsmatic’ automatic gearbox a hmang dawn a ni.