A hnu kharnaah ka hlim a, ka hlawhtling ta!

  • Lalnuntawma Fanai

Nun hi zirnain a khat a, min hual veltu pawh zirna hlir a ni. Chu zirna chuan min hnûk kal a, kan ding leh vei, kan hnung leh kan sirah min hual reng a, kan hriat loh karah awmze neiin min nghawng thin.

Khawvelah hian zirtirtu tam tak an awm a, Mizote zingah pawh zirtirtu leh zirtirtu tha bik an tam hle. Class room a ngaihtuahna seng zo chi an awm a, class room piah lama zirtir ngai mihringte enkawl hna hmu thiamte hi zirtirtu tha an ni fo mai! Chutiang zirtirtu chu tam tak an awm a, chung zinga zirtirtu tha, keima rilrua Award ka pêk ngam chu Pu Maruata, Eklavya Model Residential School Serchhip a zirtirtu hi a ni!

Pu Maruata hian class room a a zirlaite zirtirah a tawp lo a, nun hi eng nge a niht khawvela mihringte zinkawng zawh hi eng chiah nge tih hi a hmu fiah thiam a, a man fuh a, a tak ram a luhchilh a, chu chu keiin ka lo hmu fuh ve ta a ni!

February ni 19th, 2024 khan IG lamah message ka dawng a, “Sir, Thangchhuah tlang hi copy kawl i nei tawh miah lo emt Kan zirlai naupang class 12 chhuak tur ho hi present atan ka awt lutuk a,” tiin IG lamah min rawn bia a, ka phu zawk mai!

Engvanga he zawhna avanga phu zawk nge ka niht mi thiam leh ropuite chuan ho in ti mai thei. Mahse, he zawhna hi a ril ka ti a, he lehkhabu, Thangchhuah Tlang (Harsatna hnehtute zinkawng) ka ziah chhan hi a rawn man fiah hlein ka hria a, chu chuan, kum 11 liamtaa he lehkhabu ka ziah chhan hi a rawn phawrh tlat a ni.

He lehkhabu hi, mi thiamte chhiar atan ka phawrh ngam lo a, zirlai leh thangtharte tana ziak ka ni. Mahse, mithiam tia sawi tur tam takin nun hi an hmu fiah a, he harsatna hnehtute zinkawng hi chawimawina tlângah an hung chhuak thiam a, chungte chuan min tilawm a ni. Kum 2011 khan kan tlangzarh a, ‘A chhunga awmte ka chhuang si, kei hi ka nep si, miin an lei duh ang emt’ ti rêng rêngin rilru a kap a, hralh turin miin an lei duh ang em tiin ka dáwn kual a, ka zak a, ka ip a, harsa tak leh hautak êm êma an chanchin ka ziahte ka chhuang si! Keimah ka insit si, khawvel hmai êng hi ka hmu ngam lo a ni ber!

He lehkhabu hi 2011-ah kan tichhuak a, min duhsaktute an tam a, a chhunga an chanchin ka ziahte an chhuanawm si, beisei aiin ka hralh tha hle a. Chu chuan min tihlim a ni.

Kum 2022 khan siam thain, zau záwka ziah belhin, changtlung zâwkin kan tichhuak leh ta a. Kan ram hruaitu MLA tam takin an biala zirlai tithate tân min leisak a, ka lawm hle.

Vawiinah hian, Pu Maruata, Eklavya Model Residential School, Serchhipa zirtirtu hian, an zirlaite nun kawng kal zel tur ngaihtuahin, class room piah lam ram a thlir a. Ka dah that, a dang awm tawh lo, hralh tawh lo ila ka tihte chu min rawn leisak leh ta! A rilru ka ngaihtuahin, kei chuan, ‘Bu khat (1) pawh kawl ila,’ a pawi lo, tiin ka ngaihtuah ta a ni. A thupuia ka tarlan ang khian, “A hnu kharnaah ka hlawhtling ta!” tiin heng thute hi ropui ti takin ka auchhuahpui ta a ni ber e.

Lehkhabu hralh thu ka hi ka sawi ngam lo a, a hralhna man ka ngaihtuah ngam hek lo! A chhunga chuangte nun paltlang hmu a, an school a an zirlai, cl XII result nghak mekte nun kawng tur thlirtu rilru ropuizia hi ka hmu a, a chhuanawm ka ti a, thurawn ka dawn avânga hralh tawh lo tura ka dah that chu, chú zirtirtu ropui hnenah chuan ui loin ka hralh leh ta a ni! He rilru hi, a tira ka ziah lai, kum 12 liamtaa ka rilru kha a ni si!

He zirtirtu ropui rilru hian min tihlim a, a hmaa min leisaktute zawng zawng chungah pawh lawmthu ka sawi thar leh e. Ka kut chhuak, ‘THANGCHHUAH TLÂNG (Harsatna hnehtute zinkawng) chu, ka rilru ang pu mi tam tak zinga zirtirtu pakhat zarah, hlim takin a hnu kan khar ta a ni. He lehkhabu min leisak a, min duhsaktute chungah ka hlim a, ka lawmzia ka rawn sawi thar leh a nih hi!

Leave a Reply

error: Content is protected !!