Liverpool hmachhawn tur United

Nilai zan khan FA Cup fifth round khelh chhunzawm a ni a, team lian Liverpool leh Manchester United ten hnehna an chang ve ve a. Club inhal pahnih Liverpool leh United hi quarter-final-ah an inhmachhwn zui dawn. Nilai zana inkhel dangah Chelsea in hnehna an chang ve bawk.

  • Liverpool 3-0 Southampton

Carabao Cup-a an champion hnua inkhel an hmachhawn hmasak berah Liverpool chuan championship club Southampton chu Anfield-ah an mikhual a, an mualah si thum faiin hnehna an chang.

Liverpool hi an mualah khel tha viau mah se goal erawh an thun thei lawk bik lo. Minute 44-naah Lewis Koumas chuan hmahruaina goal a thu thei hram a, si khat faia hmahruai chungin chawlhlawk an hmang.

Chawlhlawk hnu lamah pawh Reds hian goal an thun mai thei bik lo. Hun tawp dawn hnaih minute 73-naah Jayden Danns chuan an goal hnihna a thun a. Danns hian minute 88-naah an goal thumna a thun zui leh bawk a. An mualah ngei si thum faia hnehna changin, quarter-final an inhlangkai ta a ni.

  • United 1-0 Nottingham Forrest

EPL club lian Manchester United chu Nottingham Forrest hmachhawn turin City Ground-ah an leng lut a, Mimualah goal thun an harsat. Hun rei tak goal a luh theih loh hnuin hun tawp dawn hnaih minute 89-naah midfielder Casemiro chuan Bruno Fernandes siamsak atangin chakna goal a thun hlauh. Casemiro goal thun hmang hian si khat faiin hnehna an chang a, quarter-final an lut zui ta a ni.

United hian quarter-final-ah fiahna hautak an hmachhawn dawn a, an hmelma lian ber Liverpool an hmachhawn zui dawn.

  • Chelsea an chak hram

Inelna hrang hranga chetha lo Chelsea chuan Stamford Bridge-ah championship club Leeds United an mikhual a, goal an chhuah hmasak zet hnuin an mualah harsa takin hnehna an chang thei hram.

Stamford Bridge-a lenglut Leeds United tan hian Mateo Joseph chuan minute 8-na lekah hmahruaina goal a thun a, Chelsea a barakhaih. He goal luh hnuin Chelsea an tang ter nghal at a, Nicolas Jackson chuan minute 15-naah goal thunin an si phurh a sut. 1-1 a nih hnu hian Mykhailo Mudryk chuan minute 37-naah hma an hruai letna goal a thun a, 2-1 a hmahruai chungin chawlhlawk an hmang.

Chawlhlawk hnu lamah Leeds in bul an tan tha nawn leh a, Mateo Joseph chuan minute 59-naah goal thunin an si phurh a sut. Hun rei tak 2-2 a an inhnehtawk reng hnuin hun tawp dawn tep minute 90-naah bench atanga lut Conor Gallagher chuan an chakna goal a thun a, he goal hmang hian quarter-final an lut zui ta a ni.

Nilai zana inkhel dangah Wolves chuan 1-0 in Brighton an hneh a, Coventry City hmachhawn turin quarter-final an lut ve bawk.

Leave a Reply

error: Content is protected !!