Mizoram tan fiahna hnuhnung

Yupia, Arunalchal Pradesh-a khelh mek FIFA Sontosh Trophy – 2023-24 final round, group stage chu vawiin hian khelh zawh a ni dawn. Mizoram an group match hnuhnung berah Railways an hmachhawn dawn. Quarter-final lut turin Mizoram hian chak an mamawh a. Railways nen an inhnehtawk a nih pawhin Karnataka leh Maharashtra te result a zirin tlang theihna hun tha an la nei dawn bawk.

Inelna neih mekah Mizoram an khel tha tawk lova, an game a nghet tawk lo. An khelh hmasak berah Maharashtra an hneh lo. An chak loh hnuin champion lai Karnataka an hmachhawn a, beisei sang lo tak chungin champion lai hmachhawn mah se bul an tan tha viau a, 2-0 in hma an hruai hman. An hmahruaina an hum zawh loh vangin uiawm takin point hnih an hloh. Karnataka nen an inhnehtawk hnuin 4-0 ngawta Railways sawptu Delhi chu 5-1 ngawtin an sawp a, an insiamtha ta anga ngaih an ni. Delhi an sawp hnu hian an elpui lian, hneh an chak ber tur Manipur an hmachhawn a, Manipur lakah 4-1 ngawtin an tlawm leh ta tlat thung. Manipur lakah an tlawm vangin dinhmun derthawngah an din phah.

Khelh li atanga point 4 hmuin Mizoram hi palinaah an awm mek. Vawiin chawhma dar 10:00 hian pahnihnaa awm mek Railways an hmachhawn zui leh dawn a, quarter-final lut chiang turin chak an mamawh. Railways lakah an chak a nih chuan quarter-final an lut ngei dawn a, table-ah pahnihna nih thei dinhmunah an ding. Railways hian nilai zan khan 1-0 in Karnataka an hneh a, khelh li atanga point 7 hmuin, quarter-final an lut chiang tawh.

Railways in quarter-final an lut chiang tawh hi Mizoram in an hlawkpui thei dawn. Quarter-final khel turin an player thate an khek a rinawm a. Helhkam nei lo, nuam ti takin Mizoram an hmachhawn thei dawn. Mizoram hian Railways B team anga ngaih an hmachhawn a rinawm a, hei vang hian chak theihna hun remchang an nei tura ngaih a ni. Quarter-final luh leh luh loh hi Mizoram kuta innghat liau liau a ni a, Railways an hneh chuan tlang a ni mai. Railways lakah an chak lova, inkhel dangah Maharashtra an chak a nih erawh chuan Mizoram hi quarter-final lut zo lovin an tla dawn thung. Railways nen an inhnehtawk a, Maharashtra leh Karnataka te an inhnehtak hlauh a nih bawk chuan Mizoram hian point nga hmuin, quarter-final an lut thei dawn bawk. Railways lakah hian an tlawm cheu a nih pawhin Karnataka leh Maharashtra an inhnehtawk a nih chuan Mizoram hian point hi an hmuh sa hi an tlangpui thei dawn.

Santosh Trophy final round, group stage khelh mekah Group A atangin Services, Goa, Kerala leh Assam ten quarter-final an lut a. Group B atangin Manipur, Railways leh Delhi ten quarter-final an lut chiang tawh bawk a. Quarter-final a hmunruak pakhat la awm hi Mizoram, Maharashtra leh Karnataka ten an inchuh mek. Railways lakah Mizoram an tlawm a, Maharashtra lakah Karnataka an chak bawk si a nih chuan table mawngphaha awm mek Karnataka hian point nga hmuin quarter-final an lut ve nawlh thei bawk.

Group khata awm, point inzat hmu an lo awm palh a nih chuan head to head en hmasak tur a ni a. Head to head-ah chungnung zawk an awm lo a nih chuan goal diference en zui leh tur a ni. Heti a nih vang Group B atanga tlang turin Mizoram dinhmun a that phah.

Leave a Reply

error: Content is protected !!