Horticulture minister Prof Lalnilawma’n Mizoramin mau a neih sate mumal taka enkawl a ngai a, project te siamin tualchhung mau hman tangkai dan tur zirin hma an la mek tih house a hrilh.
Nimin Assembly session-ah zawhna chhangin Prof Lalnilawma chuan, tualchhung mau hman tangkai dan tur zirchianna an nei a, official-te nen Taiwan-ah te zinin mau hman tangkai dan an zirchiang tihte, tualchhung maute hmang tangkai turin project-te siamin hmalak an tum mek tih a sawi.
Mau atangin ethanol siam tumin proposal siam an awm thute, UK base company-in mau atanga biocharcol siam a, investment an tihduh thu sawiin, hei hi an la final lova ngun taka ngaihtuah tur a nih thu a sawi.
Minister chuan, bioethanol leh biocharcol te, bamboo charcoal atanga fibre siam an rilruk thute, a kalpui dan tur erawh sorkar-in a la ngaihtuah dawn tih a sawi a, Mizoramin mau a neihsa te mumal taka enkawl a ngai a, inchuh buai theih thil anih avangin kalphung nghet tak neih angai niin a sawi a; bamboo resource management policy mumal tak neih angai nia an hriat thu leh an bawhzui chhoh mek thu a sawi.
Horticulture minister chuan National bamboo mission hnuaiah mau tiak 910725 phun tawh a ni a, mau tiak buaipui nana sorkarin sum asenral chu cheng nuai 648.16750 a nih thu a sawi a, mau phun tawh zat atanga dam khawchhuak zat zawhna chhang bawkin, Hmunpui leh a chhehvelah Mau phun za zela 70 vel a dam khaw chhuaka ngaih a nih thu a sawi.
Prof Nite-a chuan, Horticulture Department hnuaiah Bamboo Link Road-te chu Mau chinna khua Hmunpui ram chhung, Saiphal Zau leh Hmunpui khaw bulah te laih a ni a, Link Road laih nan hian Rs. 1,05,00,0000 hmanral a ni tih a sawi bawk.