Thawhtan zana English Premier League match awmchhunah Chelsea chuan an mikhual Newcastle United chu 3-2 in an hneh a, point thum hlutak an hmu.
Chelsea hian Stamford Bridge-a an mikhual Newcastle United lakah bul an tan tha viau a, goal an thun hma hle. Inkhel tan tanga minute 6-na lekah Nicolas Jackson chuan Cole Palmer siamsak atangin hmahruaina goal a thun. Hma akah goal an thun vangin inrintawkna sang zawk nen an mualah an inlan chhunzawm a, chalwhlawk hnu lamah goal hnih dang an thun belh leh.
Hma takah goal chhuah mahse Newcastle United an buai mai lova, an insiamtha thuai. Magpies tan hian Alexander Isak chuan minute 43-naah Bruno Guimarães siamsak atanga goal thunin an si phurh a sut a. 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal thum hmuh belh tur a awm. Minute 57-na lekah Cole Palmer chuan Fernadez siamsak atangin Chelsea goal hnihna a thun a, an hmahruai nawn lehna goal a thun. Hma an hruai nawn leh vangin Chelsea an phur a, goal an thun belh har lo. Minute 76-naah Mykhailo Mudryk chuan Gallagher siamsak atangin ang goal thumna thunin, an hmahruaina a tizau.
Goal hniha an hnufual hnuin Newcastle United in goal thun tumin tan an khawh thar chiam a, hun tawp dawn hnaiah goal a thun. Minute 90-naah Jacob Murphy chuan an goal hnihna thunin, an si phurh a sut then. Murphy goal thun vangin an phur thar viau a, Chelsea lakah point hlawhchhuah ngei tumin tan an khawh nasa hle. Goal thun tum viau mah se Magpies hi an hlawhtling zo ta lova, Chelsea lakah uiawm takin an tlawm zui ta a ni.
An muala chak Chelsea hian table laihawl an la luah phak lova, khelh 27 atanga point 39 hmuin 11-naa an awm mek. Stamford Bridge a tlawm Newcastle United hian khelh 28 atangin point 40 an hmu a, Chelsea chungah an awm mek. Blues aia an khelh tlem zawk vangin 11-naah tlahniam thei dinhmun derthawngah an ding reng thung.