March 12, Thawhleh tlai atang khan Mahindra Xuv 300 LPS Cup 2024 quarter-final khelh tan a ni a. Inkhel hmuhnawm takah Bethlehem Vengthlang leh Sihphir Venghlun VC ten hnehna changin semi-final an lut. Quarter-final hi Nilaini khan khelh chhunzawm a ni a, Kawnpui Jt VC in hnehna an chang a, semi-final an lut ve bawk.
- Sialhawk an vanduai
Quarter-final hmasa berah football a thawm nei na tak Sialhawk chu Bethlehem Vengthlang LC lakah an vanduai a, semi-final an lut zo lo.
Goalkeeper Malsawmsanga’n penalty dangin thawhlehni zan Mahindra XUV3OO LPS Cup quarterfinal inkhelah Bethlehem Vengthlang a chakpui a, goal awm lova Sialhawk nen an inhnehtawk hnuah penalty pet hmangin an tlang.
Rajiv Gandhi Stadium, Mualpuiah boruak nei ve vein semifinal luh an inchuh hmasa ber a. Minute 120 chhungin Sialhawkin goal thun theihna hun tha an puitlin thei lo tluan a, penalty petah Bethlehem Vengthlang goal veng Sawmsanga’n Lalfamkima pet dansakin goal nga goal thumin an chak.
2016 champion Bethlehem Vengthlangin penalty pet hmangin hnehna an chang zawn a, round of 16-ah 2017 champion Chhinga Veng pet thla tawhin captain Lalrammawia’n penalty hmasa ber chhuih lut ve vein Divya Player of the Match lawmman a dawng zawn.
Aizawl district pawn atanga sawm bik team pali zinga mi Sialhawkin round of 16-ah goal hnih goal khatin Ramhlun North an hneh a, tun kum thum chhungin inelna hrang hrangah vawi thum an hneh zawnna a ni.
2023 YMA football round of 16-ah Bethlehem Vengthlang lakah 2-0-in an tlawm a, chhang let ngei tumin Ramhlun North hmaa an chhawr theih loh an player pawimawh midfielder Crespo Vanlalhriatpuia leh defender Lalrinzuala Khiangte an ko kir.
A tir minute 13 chhungin Sialhawkin thun mai theihna remchang vawi thum an nei a, minute thumah Bethlehem Vengthlang keeper Muansanga’n F Lalawmkima pet nam persak mah se na takin an nawr zui zel.
Moses Lalrinzuala’n a sirah khalh luhin tha zetin a siam a, tibuaitu nei lo Crespo-an petin defender Remlalfaka goal line hma chiah atangin a dang chhuak a; Moses-an vei lam atangin fuh takin a vawrh let a, Lawma’n hnai tak atangin goal zawn lovah a tauh chhuak.
Aizawl team insiam remin tlar hmaa mal tlat Rammawia’n rin ngamin khel a, minute 16-ah T Vanlalruata’n yard 30 vel atangin Bethlehem Vengthlang tan freekick a pet lut teuh hle bawk.
Sialhawkin goal hlauhawm siam chhuah an harsat zui a, first half tawp lamah Sawmsanga a talbuai laiin Crespo chuan khung mai theih tura ngaih a nih laiin a pet tha lo hle a ni.
Hun pek belh minute 30 an khelh chhungin Sialhawk tan Rinzuala’n freekick petin Lalhmangaihsanga’n goal zawn lovah a tauh a, tournament kal mekah goal khung lova hun tawp a hman vawi khatna a ni.
Penalty pet hmanga a chak zawnnaah Sawmsanga’n Sialhawk atanga pen chhuak hmasa ber Famkima pet zuan fuhin a dansak nghal a; mi dang zawngin chhuih lut vekin Bethlehem Vengthlangin a tum hnih nan champion thei turin rahbi an tuk sang zel.
- Sihphir an kal zel
Inelna neih meka chetha, Republic Veng paltlanga quarter-final lut Sihphir Venghlun an khel tha chhunzawm viau a. Quarter-final a an khingpui Thenzawl Jt. VC chu si li faia sawpin semi-final an lut.
Sihphir Venghlun tan Ricky Lalramnghaka a khel tha viau a, minute 17’ 68 leh 82-ahte goal thunin hattrick a siam a, an khua a chakpui. Sihphir goal dang hi Thenzawl Jt VC player Lalhruaichhunga’n minute 41-naah an lama a tih goal a ni. Champion tura rinkai Thenzawl Jt an sawp zui leh tak vangin Sihphir Venghlun VC hian champion turin rin an kai leh zual ta hle.
Nilaini khan LPS Cup quarter-final khelh chhunzawm a ni a. Kawnpui Jt VC in an khingpui Armed Veng Local Council chu minute 18-naa Lalkrossmawia goal thun hmangin an hneh a, semi-final an lut ve bawk.