Khawvelpuma tlangzarh a nih atanga thla riat hnu-ah ‘Oppeinheimer’ film chu Japan-ah tihchhuah a ni dawn ta a, enti ang takin nge Atomic bomb siamchhuaktu chanchin tarlanna film an lo dawnsawn ang, tih chu hriat chakawm a tling.
Ruahman dan chuan Christopher Nolan-a Oscar winning film, ‘Oppenheimer’ hi March 29, 2024-ah Japan-ah a vawikhat nan mipui en theih turin an tichhuak dawn a ni.
Atomic bomb puak hmachhawn hmasa bertu Japanese te tan an khawpui pahnih Hiroshima leh Nagasaki-a chhiatna rapthlak thleng kha theihnghilh hmak theih a ni lo.
Tun tumah pawh film poster tihchhuahah tunhma lam zawnga poster kha siamtha in, bomb tower hmaa Cillian Murphy-a thlalak chauh dah a ni.
Hiroshima Mayor hlui Takashi Hiraoka chuan he film-in atomic bomb hman chungchangah thil tihawm tak nia tarlan chu na takin a dem.
“American nunna tam tak chhanhim a nih theih nan atomic bomb hi hman a ni, tih lantir theihna tura an film siam ah hian thiamthu sawina remchanga hman an tum ngar ngar a ni,” a ti.