Europe khawmuala ram hrang hrangte football-a an inelna ngaihhlut hlawh ber Euro chu June 14- July 14, 2024 chhungin Germany-ah khelh a ni dawn. Euro 2024 kan hnaih zel a, inelna lian hmachhawn tura player an inbuatsaih sung sung laiin Euro 2024 hmachhawn thei lo tur an pung ve zel bawk. Euro 2024 hmachhawn thei lo tura ngaih langsar zual kan tarlang ang.
- David Alaba (Austria)
Real Madrid defender daihzai, Austria tana player pawimawh em em, tlarhnung ban rinawm hian December thlaa Villareal an hmachhawn tumin hliam na tak a tuar a. Dam tha viah turin thla riat tal a mamawh tura ngaih a ni. Heti a nih vang hian Euro 2024 khel turin an dam chiang hman dawn lova, Austria tan a inlan thei lo tura ngaih a ni. Real Madrid defender Alaba tel thei lo tur hi Austria tan chuan channa lian tak a ni ngei ang.
- Domenico Berardi (Italy)
Italy player pawimawh Domenico Berardi hi hliam vangin a chawl reng hnuin a kir a, club leh ram tan a inlan leh thei tan tawh. A hliam dam hnu March ni 3 khan Sassuolo in Verona an hmachhawn tumin a ke ding lamah hliam na tak a nei thar leh a, hliam na zawkin a tibuai thar leh. A hliam dam chian leh nan hun a mamawh rei a, kum thar lamah a inkhel leh thei chauh tura ngaih a ni. Euro 2020 a an champion tumin Italy squad-ah tel mah se Euro 2024-ah erawh a inlan thei dawn ta lo.
- Sven Botman (Netherlands)
Netherland hi Centre-back nei tha ber pawl an ni a, hemi position-ah hian inelna a nasa hle. Inelna nasa tak karah Sven Botman chuan hliam vangin Ronald Koeman-a squad-ah hmun a chang ve thei dawn lo. Botman hian March ni 16-a Newcastle United in Manchester City an hmachhawn tum khan hliam na tak a tuar a. Hliam vang hian thla 6-9 a chawlh a ngai ang. Euro 2024 chu in lum atanga a lo en mai a ngai dawn ta tihna a ni.
- Thibaut Courtois (Belgium)
Real Madrid si nghak tha zet mai Thibaut Courtois hi Belgium inngahna lian tak a ni a, an si nghak duhthlan, khawih chet thiang lo tluk a ni. Kum 31 mi Courtois hi hliam vangin season kal mekah a inlan tam thei lo. March thla tawp lam hi chuan dam hman tawh tura beisei a ni a, club leh ram in a dam hun nghakhlel takin an thlir. A dam tan tawh a vanduai nawn leh a, training na lamah a khupah hliam a tuar nawn leh. Hliam a tuar nawn leh vangin tun season chhung chu a inlan lo tluan tura ngaih a ni.
“Euro 2024 a khelh ngei theih nan theihtawp tak meuh ka chhuah a, mahse a inpeih hman dawn ta lo a ni. A pawi lungrun khawp mai”, tiin Belgium manager in Germany-a inelnaah Courtois an hruai theih loh tur thu a sawi ta hial a ni.
- Gavi (Spain)
Gavi hliam chungchangah inpuhmawhna a awm a, FC Barcelona chuan dimdawi ngai tak chunga Gavi a chhawr luih vangin Spain coach Luis de la Fuente an sawisel a, Gavi hliam chhanah an puh. Euro 2024 qualifier a Georgia an hmachhawn tumin Gavi hian bul a tan a. Ni thum hnu leka Cyprus an hmachhawn tumin bul a tan leh bawk a. Georgia an hmachhawn tuma Spain player pahnih chiahin Cyprus lakah bul an tan a, chung zinga pakhat chu Gavi hi a ni. Dimdawi a ngaih laia rim taka chhawr a nih hnu lawkah Valladolid an hmachhawn tumin hliam a tuar ta nge nge a. Minute 24 chhung lek mual chhunga hun a hman hnuin loh theih loha lakchhuah a ngai. He a hliam vang hian Euro 2024 a hmachhawn theih dawn loh phah.
Luis de la Fuente hian Barcelona puhna chhangin, thil thleng palh a ni thu a sawi a. Inhnialna karah Spanish Football Federation (RFEF) chuan Gavi hi 2025 a inherchhuah hma chuan ram khel tura ko rih lo turin thutlukna an siam niin report a awm. 2024-25 season tir lamah kir hman tura beisei ni mah se Gavi hian Spain tana khel leh turin kum 2025 a nghah chhuah phawt a ngai dawn ta a ni.
- Reece James (England)
England leh Chelsea defender pawimawh Reece James hian hliam a tuar mek a, Euro 2024 khel turin dam hman a tum hle. Euro 2024 tan hmain a dam hman tura beisei a ni a. Damkawr mai a la nih dawn vangin England manager Gareth Southgate tan chhawr luih ngam a har dawn a, risk lak ngam a har ang. Germany an pan hmain chhawr tlak a ni ngei tih James hian a lantir hman a ngai dawn a. Chelsea tan season kal meka vawi kua chauh la khel tan chu chu thil theih loh tluk a ni dawnin a lang thung. Heti a nih vang hian Reece James hian Euro 2024 a hmachhawn thei lo tura ngaih a ni.
- Christopher Nkunku (France)
Beiseina sang tak nen Chelsea a zawm hnuin Christopher Nkunku hi hliamin a tibuai. Pre-season training na lamah hliam a neih vangin a khup zai a ni a, hei vang hian thla li chhung zet a inlan thei lo phawt. June 2023 hnu lamah France tan a la inlan leh miah lo bawk. Hliamin tihbuai vangin club leh ram tan a inlan tam thei lova, April thlaah dam hman tura beisei ni bawk mah se France tan khel turin a inpeih hman lo tura ngaih a ni a. Inelna lian hmachhawn turin France hian an koh a rinawm loh.
- Ivan Perisic (Croatia)
Croatia player pawimawh, ram tan vawi 129 lai inlan tling tawh Ivan Perisic hian September, 2023 khan hliam na tak a tuar a. A hliam vang hian season kal mekah club leh ram tan inkhel a la hmachhawn lo. Season tawp ruala contract hmang zo mai tur a nih vangin Tottenham manager Manager Ange Postecoglou chuan Perisic hian Spurs tan a khelh leh a rin tawh loh thu a sawi hial bawk. Hetihlai hian Perisic hian April thla-ah damin, Euro 2024 khel tura a inpeih hman a rin thu a sawi ve thung a. Tun dinhmunah chuan Euro 2024 hmachhawn lo tur langsar zingah a tel mek thung.