MNF Adviser Er K Lalsawmvela chuan Aizawl Hmar lama Aizawl bypass kawngpui siamna tur atana leiverh bika harsatna awm avanga cancel tura chief minister Lalduhoma’n a sawi chu thil hriat chian tawk loh vangah a puh.
Nilaini khan Aizawl Press Club-ah thu thar thehdarhtute kawmin Er K Lalsawmvela chuan Aizawl hmar lama Aizawl bypass, Silchar atanga Aizawl four lane, Sairang chhak atanga intan hi contract package 3-ah siam a nih thu sawiin, “He kawng kaldan tur NHIDCL Consultant-in rawtna pathum a siam chu khatih laia Chief Minister Zoramthanga hova sawi ho vin, CM duhdan tak chu NHIDCL lam pawhin pawmin, final a ni ta a. Khawmual chin, package 1 leh 3 chu March 2023 khan contractor hnenah hna pekfel a ni tawh,” tiin, compensation leh forest clearance fel loh vanga hna tan hrih loh mai a nih thu a sawi.
Package 2 bik leiverh chungchang sawiin Er K Lalsawmvela chuan, January 8, 2024-a ZPM office-a Chief Minister Lalduhoma’n a a Delhi zin report a pekah, leiverh bik hi harsatna deuh avanga cancel hial an tum mek, MoRT&H Minister Nitin Gadkari a sawipui hnua pawm leh ni ta tih sawiin, “Hei hi thang that lak duh vanga mipui rilru dik lova hruaikawi tumna emaw, hriat chian loh vang emaw niin a lang,” a ti.
Er K Lalsawmvela chuan, “Thil awm dan dik tak, NHIDCL hotute hnen atanga kan hriat dan chu, Aizawl bypass tunnel hi engtiklai mahin, khawi level-ah mah cancel emaw, en that turin emaw, rawtna a awm ngai lo,” tiin, package 1 leh 3 contract pek vek hnuah a lai a mi package 2 cancel hi thil tih chi hauh loh a nih vakah, tunnel pawh hi October, 2023- ah tender chhuah tawh a nih thu leh, Mizoram Assembly Election Model Code of Conduct-in a phuar avangin an chawlhsan hrih thu leh, MCC phelh hnu, December 6, 2023-ah high level meeting-in DPR pawm turin a rel bakah formal approval la tura hma lak nghal a nih thu a sawi.
January 4, 2024 vela Chief Minister Lalduhoma’n Union Highway Minister a hmuh hnu lawkah twitter hmangin approve a nih thu a tar lang ta mai nia a lan thu sawiin MNF Adviser hian, “Tu emaw zu sawi vanga sanction ni lo vin, a hma daih atanga ruahmanna fel tak awm sa, Minister-in January 4 vela a pawm, January 15, 2024-ah official sanction lo chhuak ta mai niin a lang e. He leiverh hna hi tender chhang tu 17 atangin IRCON International Ltd chu pek a ni ta a. Kum thum chhung thawkin, kum 10 chhung maintain zui tura tih a ni,” a ti.
MNF Adviser hian EPC mode contract hi ZPM sorkarin kalpui an tum anih dan leh he leiverh project, EPC mode-a tih pawh hi Mizorama a vawikhatna nia hriat thu CM-in a sawi pawh hriat sual palh a ni tih sawiin, “NH project-ah chuan 2018 atang khan State PWD hian a hmang tan daih tawh a. State PWD hna, Bamboo Link Road pahnih pawh EPC mode a tender chhuah a ni tawh,” a ti bawk.