Aizawl : Congress Party Lok Sabha MP Candidate Lalbiakzama’n Lok Sabha inthlan lo awm tur hi MNF leh ZPM te nena inbeihna ni lo vin, Kristian-te nekchep a tih boral tumtu BJP leh sakhaw zalenna humhalhtu Congress party te indona a nih thu a sawi.
Siaha Bazar-a nimina vantlang inkhawm buatsaihah Lalbiakzama chuan, ram chhunga BJP sorkar chet dan ngun taka chhutin an rawva tulh tulh a, pawisak an nei lo tual tual tih sawiin, “Nikum chhung ringawt pawhin India ram hmun hrang hrangah Kristiante tihduhdahna vawi 648 a thleng tawh a ni,” a ti.
Lalbiakzama chuan India ram lairil zawka kristian missionary te chu enthlak reng an nih avangin, chanchin tha hrilh hi BJP sorkar hnuaia a harsa hle tawh tih a sawi a. Assam a BJP sorkar phei chuan tihdam rawngbawl hna thawh phal lovin Assembly House ah dan an pass tawh a, nasa zawkin kristian tana harsatna siam turin ke an pen zel tih a sawi a. India danpui bung 25-naah chuan sakhaw tinten zalen taka mission hna an thawh hi an chanvo tur a nih laiin, BJP sorkar chuan he dan hi tidanglam chuang si lovin kristiante tan harsatna min siam chho char char niin a sawi.
Institution hrang hranga Principal leh Dean ni turin thiamna mai bakah RSS chhuak nih a ngai tawh nia sawiin Lalbiakzama chuan, “RSS te chuan India hi Hindu mite chenna tur a anih thu inzirtirin hnam tlem zawk leh sakhaw tlem zawkte chungah hleihluak takin chet an thawh zel a. Rawva tak taka kristiante sawisa a, rawktute lakah FIR chu theh lut ve mah se, jail an tang thei lo va. A lehlingin Kristianten min bum tiin pawisa te pawh an chawi tir zawk a ni. Hei vang hian India rama roreltu tur kan hma lawkah kan thlang dawn a. Mizo Kristiante hian ngaihtuahna fim tak hmangin he inthlanna hi kan hmachhawn a tul a ni,” a ti.
Vantlang inkhawmah hian MPCC President Lal Thanzara pawhin thu sawiin, Congress party candidate a nih vang ngawtin vote lo tura mipui ngenin, “Central-ah BJP a sorkar leh a nih chuan kan sakhaw lungphum a nghing zual dawn a. Kan missionary te an chep sauh dawn a ni,” tiin, Krista ringtu an nih avangin chanchintha hrilh khap chho mek BJP te bula thu tur MNF leh an lamtang nia rinhlelh te ZPM vote lo turin mipui a ngen.