Aizawl : Regional Directorate of NSS, Guwahati leh State NSS Cell, Mizoram buatsaih North East NSS Festival chu April 2-6, 2024 chhunga hman turin Art & Culture Complex, Berawtlang, Aizawlah neih mek a ni. April 2 (Thawhlehni) kha North East State 8- Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura atangin NSS Volunteer 280 leh Programme Officer 20 velte thlen kim hun a ni.
April 3 (Nilaini) khan NE NSS Festival hawnna hun hi hman a ni a. Khuallianah Prof. Dibakar Chandra Deka, Vice Chancellor, Mizoram University hman a ni. He hawnna hun hi Prof. Benjamin L. Saitluanga, Programme Coordinator, NSS Cell, Mizoram University chuan a kaihruai a. Mr. Jangjilong, Regional Director, Guwahati te, Mr. F. Sangvuana, State NSS Officer leh Khualliante hnen atanga thusawi ngaihthlak a nih bakah, NSS Volunteer hrang hrangte’n an hnam lam leh theihna hrang hrangte an entir bawk a ni.
NE NSS Festival neih chhung hian thupui hrang hrang hmanga inzirtirna hun te, Cultural programme te, Sightseeing te bakah Social Work te pawh neih tur a ni.
Tun dinhmunah hian Mizoramah University leh College-ah NSS Unit dinna hi 29 a awm a, Higher Secondary-ah NSS Unit dinna School hi 71 a awm a ni. NSS Volunteer hi Mizoramah 30,100 an awm mek a ni.