Semi-final hnuhnung zawk hi thawhtan zan khan Mumbai Football Arena-ah khelh a ni a, inkhel hmuhnawm takah Mualneitu Mumbai City FC chuan an mikhual FC Goa chu si hnih faiin an hneh a, si belhkhawmah 5-2 ngawta chakin final an lut.
Semi-final thawhkhatnaah Mumbai City FC hian Lallianzuala Chhangte goal thun hmangin FC Goa in 3-2 in an lo lehthal tawh a, final an hnaih sawt. Mumbai Arena-a inkhel hmuhnawm takah hian Jorge Pereyra Díaz chuan minute 69-naah Mumbai team hmahruaina goal a thun. An si phurh sut an tum luatah FC Goa an chesual a, hun tawp dawn hnaihah goal an chhuah belh leh. Mumbai team lian hian fuh zetin an mikhual an nawr let thut, tlan chak leh ball thiam Lallianzuala Chhangte chuan fuh takin ball a um lut a, inringtawk taka si nghak leh defender a bul kual hnuin goal ruakah awlsam takin a pet goal a, minute 82-naah an goal hnihna thunin, an chakna a nem nghet.
LZ Chhangte goal thun hnu hia goal dang a luh belh tawh lo va, Mumbai City FC chuan si belhkhawmah 5-2 a hnehna changin final an lut a. Final-ah league trophy an kawl mek chhuhsaktu Mohun Bagan an hmachhawn dawn. ISL League-ah Mumbai City FC hian hma an hruai reng a, champion nawn leh tura ngaih an nih laiin an match hnuhnung berah Mohun Bagan lakah an tlawm a, Kolkata club lian hian lehpelin, League champion an ni ta daih. League-ah pawh inel tawk ber pahnihte final-ah an intum zui leh dawn a, final hmuhnawm tak a nih ngei a rinawm. ISL final hi May ni 4, Inrinni zan khian Salt Lake Stadium-ah khelh a ni ang.